Struktura e Posaçme Antikorrupsion pritet që të jetë gati shumë shpejt. Pas muajsh të tërë zvarritje, duket se organi më i rëndësishëm i reformës në drejtësi do marrë jetë. Vetingu deri më tani ka larguar gjyqtarët dhe prokurorët e korruptuar, por zyrtarëve të përfshirë në afera nuk u ka hyrë asnjë gjemb në këmbë. Por dita kur të gjithë do japin llogari duket se nuk do të jetë e largët.
Komisioneri Publik ka informuar dje se nuk do të ankimojë në Apel vendimin e konfirmimit në detyrë të prokurores Elida Kaçkini. Kjo e fundit është mes 15 kandidatëve finalë të SPAK dhe mosankimi për të është një hap tjetër i rëndësishëm drejt SPAK. Deri tani Komisioni i Pavarur i Kualifikimit ka kaluar në “sitën” e vetingut 10 kandidatë. Nga këta, 8 mund të quhen prokurorë zyrtarë të SPAK, pasi për dy të tjerë do të duhet të pritet vendimi i Kolegjit të Apelimit. Më konkretisht, 8 emrat që do marrin të parët në dorë luftën antikorrupsion janë: Arben Kraja, Enkeleda Millonai, Ened Nakuçi, Edvin Kondilli, Behar Dibra, Altin Dumani, Klodjan Braho dhe Elida Kaçkini. Ndërsa në Apel janë Besnik Muçi dhe Enkeleda Millonai. KLP ka bërë të ditur se mund të nisë emërimet dhe më pakë se 10 emra. Kjo do të thotë se SPAK mund të nisë punë dhe me 8 emrat në fjalë. Pritet që javën që vjen KLP të marrë një vendim dhe sipas burimeve, plani është që brenda tetorit të emërohen prokurorët e parë. Por në lëvizje është vënë dhe Komisioni i Pavarur i Kualifikimit. Ky i fundit ka përfunduar hetimet për 5 kandidatët e fundit. Dje doli në seancë dëgjimore Anita Jella.
Por seanca u shty për pak ditë, pasi ONM kishte dorëzuar pak më herët një dokument dhe komisionerët vendosën të marrin kohë për ta shqyrtuar. Ndërkohë në datë 7 do dalë para KPK kandidati tjetër i SPAK, Ndini Tavani. Pra kjo do të thotë se shumë shpejt vetingu do mbyllet për të 15 kandidatët finalë. Dhe një gjë e tillë duket se do bëjë me dhimbje koke shumë pushtetarë, të cilët për shkak të korrupsionit do të duhet të përballen me drejtësinë. SPAK pritet që të kalojë në skaner nga presidenti e kryeministri, deri te ministra, ish-ministra, deputetë, ish-kryeministra, etj.
SHBA paralajmëron tërmet
Teksa organet e reja të drejtësisë po punojnë për të ngritur SPAK, një mbështetje e madhe po vjen dhe nga partnerët amerikanë. Dje ka folur për ecurinë e SPAK dhe BKH, përfaqësuesja e OPDAT, Michele Lakomy. OPDAT është ndër organizatat që ka udhëhequr këtë reformë dhe gjithçka bëhet sipas planeve të tyre. Lakomy bëri të ditur se SHBA do mbështesë SPAK dhe Byronë e Hetimit për të shfarosur korrupsionin. Ajo dha dhe detaje si do ngrihet BKH. “Një nga qëllimet kryesore që ka OPDAT, është të ndihmojë Shqipërinë në luftën kundër korrupsionit dhe krimit të organizuar. Së bashku me delegacionin e BE, po kontribuojmë në ngritjen e SPAK-ut. Ky institucioni i ri kushtetues është i organizuar në dy nivele: Atë të Prokurorisë të posaçme dhe atë të Byrosë së Hetimit. Byroja e Hetimit do të shërbeje në mënyrë të ngjashme si FBI në SHBA. Të gjithë hetuesit që do të shërbejnë në këtë strukturë dhe në atë të Prokurorisë, duhet të kenë integritetit të lartë profesional dhe moral. Aktualisht jemi duke mbështetur KLP-në, ngritjen e këtyre struktura dhe duke përcaktuar rregulla të qarta e objektive”, tha ajo. Ekspertja amerikane deklaroi se si prokurorët e SPAK, ashtu dhe hetuesit e BKH do të shkojnë për specializim në SHBA, ku do mësojnë teknikat për të goditur korrupsionin dhe krimin e organizuar. “Pasi të ngrihet Byroja e Hetimit, ata do të trajnohen në Virginia të Shteteve të Bashkuara me një program 2 vjeçar, po kështu edhe prokuroret. SHBA, Ambasada Amerikane në Tiranë dhe OPDAT, do të vazhdojnë të ofrojnë mbështetjen e tyre të pa kursyer në ngritjen dhe funksionimin e strukturave të reja. Me ngritjen e këtyre strukturave do të luftohen një sërë veprash të rënda penale sikurse është korrupsioni në nivele të larta drejtuese, krimi i organizuar, trafiqet, etj. Tashmë ata që kanë qenë të paprekshëm do të përgjigjen para organeve të reja të drejtësisë sikurse është SPAK, që do krijohet së shpejti”, tha ajo më tej. Pra SHBA e ka theksuar dhe një herë se SPAK e BKH do sjellin tërmet në Shqipëri. Sot /Kliti Topalli