Kryeministri Edi Rama bëri të qartë se Shqipëria do të arrijë t’i plotësojë dy kushtet e Bundestagut gjerman për çeljen e negociatave, siç janë Gjykata Kushtetuese dhe e Lartë, dhe miratimi i reformës zgjedhore sipas rekomandimeve të OSBE/ODIHR. Kreu i qeverisë tha se rruga drejt anëtarësimit të BE është e gjatë, dhe nëse Shqipërisë i çelen zyrtarisht negociatat, kushtet që duhet të plotësojë për tu bërë shtet i BE-së janë të shumta. Hapi i parë për t’iu afruar PO-së së negociatave, është reforma zgjedhore, dhe për këtë shefi i mazhorancës kërkoi bashkëpunimin dhe votën e opozitës se re, ndërsa ju përgjigj liderit demokrat Lulzim Basha duke thënë se nuk është në pozitat për të vënë kushte për dialog për zgjedhoren.
Kreu i qeverisë Edi Rama këmbënguli gjatë fjalës së tij në Kuvend, se çelja apo jo e negociatave të Shqipërisë për anëtarësim në Bashkimin Evropian, nuk varet nga detyrat që duhet të kryejë vendi, pasi siç Rama u shpreh Shqipëria është në rrugën e duhur, por e gjitha varet nga politika dhe interesa të brendshme të vendeve anëtare në BE që duhet të japim një votë politike për të mikëpritur apo jo Shqipërinë, disa prej të cilave janë anti-zgjerim.