Kryetarja e LSI-së, Monika Kryemadhi ne 15-vjetorin e themelimit të kësaj partie iu drejtua me një thirrje të fortë qytetarëve shqiptarë, ndërsa kërkoi prej tyre të braktisin menjëherë qendrat tregtare të oligarkëve dhe pazaret t’i kryejnë në dyqanet e lagjeve.
Kryemadhi tha se shqiptarët duhet të shpenzojnë për produktet ushqimore te dyqanet e lagjeve ku banojnë, dhe të bojkotojnë “supermarketet e oligarkëve”. Kryetarja e LSI tha se të njëjtën gjë shqiptarët duhet të bëjnë edhe me veshjet, duke bojkotuar qendrat tregtare si dhe me taksitë, duke mos faturuar ato të cilat “janë të lidhura me oligarkët”.
Pjesë nga fjala e Kryemadhit:
Si opozitë e bashkuar kemi kundërshtuar çdo koncesion, kemi mbështetur iniciativat e personave në nevojë, por ku jemi ne sot. Sot nuk jemi në parlament. Sistemi kriminal dhe oligarkik i Edi Ramës nuk e mundëson debatin e vlerave. S’mund të jemi fasadë e një kryeministri të lidhur kokë e këmbë me krimin. Sot unë ju bëj thirrje të gjithë anëtarëve të LSI dhe të gjithë shqiptarëve, që ushqimet e tyre të mos i blejnë në supermarketet e oligarkëve, por në dyqanet e shqiptarëve. I bëj thirrje të mos blejnë veshje në qendrat tregtare të oligarkëve, por në dyqanet e shqiptarëve, të mos përdorin taksitë e atyre që janë të lidhur me oligarkët, por taksitë e shqiptarëve që punojnë për bukën e gojës. Ne mund të nisim kështu një revolucion.