Guvernatori pa mandat i propozuar dhe i vendosuar aty nga pazaret e Ilir Metës Gent Sejko, do të mbahet mend si njeriu i skandaleve. Për sa kohë që Banka e Shqipërisë po drejtohet prej tij, euroja ka rënë në pikatë, ndërsa kreditë e këqija janë rritur ndjeshëm. Por një tjetër skandal që ka ndodhur dhe që jo të gjithë flasin është ai i falimentimit të “Veneto Banka”, gjë që solli që kreditë e këqija të kapin majat.
Ikja e kësaj banke nga vendi ynë, bën me përgjegjësi vetë Gent Sejkon, i cili lejoi që të bëhen pazare në vendin tonë dhe të dëmtohen me qindra kredimarrës. Por çfarë ka ndodhur realisht? Në vitin 2017 qeveria italiane shpall falimentin e “Veneto Banka”. Në qershor 2017, fotografohet sistemi BOS Banking Operation System dhe klientët me 1 muaj apo 2 muaj vonesë të kredive klasifikohen si kredi e keqe. Pasi përgatitet materiali i totalit të kredive, dërgohet në Itali. Më pas i kërkohet qeverisë italiane që këto para të shkojnë në llogari të “Intesa San Paolo”. Shuma e parë ishte 25 mln euro, provigjionime (fondet që bankat vënë mënjanë për të mbuluar kreditë e pakthyera në afat nga bankat) për Bankën e Shqipërisë. Pra një bankë që kishte maksimumi 12-13 mln euro kredi të keqe, shkon në 50 mln kredi të keqe menjëherë. Më pas u jepet statusi “kredi e shitur”. Pra të gjitha të dhënat në Bankën e Shqipërisë janë zhdukur, pasi kredia figuron e shitur. Klientët njoftohen më pas që këstin duhet ta paguajnë te “Intesa Sanpaolo Bank”, kjo në shkelje të kontratës. Edhe këtu Gent Sejko mbylli sytë duke lejuar një masakër me klientët e “Veneto Banaka”. Gazeta në ditë në vijim do tregojë të tjera fakte, por shitja e kredisë nuk mund të bëhej pa rolin e Bakës së Shqipërisë duke bërë që në këtë mes të implikohet guvernatori pa mandat.
Skandalet e Sejkos
Sipas dokumenteve të siguruara nga gazeta, në datën 22 Nëntor 2017, Banka e Shqipërisë i ndez dritën jeshile një shoqërie italiane (SGA) për mbledhje borxhesh të këqija me origjinë në Napoli, që të kryejë kontratën e “servicing” të klientëve të bankës së falimentuar “Veneto Banka”, me një ent juridik shqiptar. SGA që mori përsipër menaxhimin e borxheve të këqija, me një autorizim të thjeshtë noterial ia kaloi këtë menaxhim shoqërisë Tranzit Shpk. Kjo kompani figuron pjesë e “ABI Bank” dhe është shoqëri offshore me seli në ishujt Cayman. Duhet nënvizuar fakti se shumë klientë të kredituar nga ana e “Veneto Banka” në Shqipëri kanë depozituar pranë gjykatave në Shqipëri, zhdukjen e kredive të tyre nga sistemi i Regjistrit të Kredive pranë Bankës së Shqipërisë të cilat rezultojnë me status “të shitura”. Po kujt i janë shitur këto kredi? Institucioni i Bankës së Shqipërisë nuk ka dhënë asnjë sqarim për këtë çështje duke konfirmuar se është ai përgjegjësi. E njëjta situatë edhe në Regjistrin e Hipotekës ku pronat e shqiptarëve të lëna si garanci hipotekore pranë “Veneto Banka”, rezultojnë të kenë “fluturuar” drejt Italisë në një Shoqëri Përmbarimore Italiane, pra SGA spa. Edhe në këtë mes ka gisht Banka e Shqipërisë. Pronat e shqiptarëve figurojnë kolateral në një kompani me qendër në Itali. Sigurisht që asgjë nuk mund të bëhej pa bekimin e Gent Sejkos. Gazet do të tregojë në ditë në vijim të tjera detaje që implikojnë vetë Bankën e Shqipërisë. Oligarkët e bankave kanë kapur guvernatorin, pasi për shkak të heshtjes së BSH kredituesit e “Vento Banka” po përballen me shumë presione. Mjafton një ditë vonese për kredinë dhe shuma rritet në shifra marramendëse. Por në një shtet ku bankë qendrore nuk ekziston, ndodhin dhe të tilla gjëra.
Kliti Topalli