Pas daljeve të përgjimeve nga media gjermane BILD, ka reaguar për herë të parë zëvendëskryeministri Erion Braçe në një deklaratë për mediat, ku ka theksuar se bisedat telefonike duhet të vërtetohen.
“Prokuroria vërteton autenticitetin e tyre. Unë nuk jam akoma socialist i vjetër. Ndreu nuk thotë që secili mësues në qarkun e Dibrës nëse nuk votojnë në PS do te fluturojnë nga puna.
Ai ka folur me një drejtues të PS-së. Sipas ligjit drejtuesit e shkollave nuk janë të ndaluar të merren me aktivitetin politik.
Përgjime për çfarë? Kush ka folur për përgjime? Në asnjë prej përgjimeve të publikuara, në gojën e Vangjush Dakos, nuk flitet në asnjë germë për ofrim të parave.
Në përgjime nuk flitet për shitblerje votash. Drejtorët e shkollave nuk ndalohen që të votojnë”, theksoj Braçe.
“Shefi i komisariatit të Dibrës (Robert Aga) nuk ka blerë vota. Ka ruajtur sigurinë nga një b.andë partiake që ishte prezent. Kjo bandë ka d.hunuar përfaqësues të qendrave të votimit në Maqellarë”.
Z. Pjerin Ndreu nuk thotë që mësuesit në qarkun e Dibrës duhet të fluturojnë nga puna. Por e ka fjalën për një drejtues të PS. Atij mund ti kërkojë llogari…”, tha Braçe.
Insistimit të gazetarëve se gjithë strukturat e shtetit përfshirë dhe policinë janë vendosur në funksion të fushatës elektorale të zgjedhjeve lokale të Dibrës në 2016 siç del në përgjime, Braçe u përgjigj:
“Përgjimet… ku flitet për shitblerje votash? Prokuroria duhet të vertetojë autenticitetin e zërit. Mund të them se Vangjush Dako as Damian Gjiknuri në asnjë germë s’kanë fol për këmbim të parave.
Pastaj është prokuroria ajo që duhet të vertetojë në përputhje me ligjin: A janë paguar para apo jo. Përgjegjësia është individuale”.
Po kështu Braçe kërkoi të mbajë përgjegjësi ai që ka nxjerr përgjimet. “Ai prokurori politik që ka drejtuar fushatën e urrejtjes ndaj PS-së duhet të mbajë përgjegjësi”, deklaroi zv/kryeministri.