Dosjet e vlerësimit për kandidatët e Strukturës së Posaçme Antikorrupsion pritet të mbyllen ditën e enjte. Pak ditë më parë Këshilli i Lartë i Prokurorisë i dha edhe tri javë kohë vetes për ta përmbyllur këtë fazë të punës për ngritjen e SPAK dhe afati i fundit është data 6 qershor.
Tani pritet që brenda të enjtes KLP të mblidhet dhe të diskutojë e miratojë aktet për kandidatët që kanë mbetur pa kaluar në “sitën” e Komisionit të Posaçëm, të ngritur për të vlerësuar ata nga ana profesionale. Deri tani Këshilli i Lartë i Prokurorisë ka miratuar dosjet për 12 kandidatë, ndërsa kanë mbetur pa u vlerësuar edhe gjysma e aplikantëve të tjerë.
Më konkretisht, kandidatët të cilët KLP i ka vlerësuar profesionalisht janë prokurorët e Krimeve të Rënda, Edvin Kondili, Ened Nakuçi, Eugen Beçi, Manjola Kajani, Doloreza Musabelliu dhe Vladimir Mara, kryeprokurorja e Tiranës, Elisabeta Imeraj, prokurorja e Elbasanit, Enkeleda Millonai, prokurori i Prokurorisë së Apelit Tiranë, Altin Dumani apo edhe prokurorët Shkëlzen Cena, Behar Dibra dhe Klodian Braho.
Për të 12-të këta emra KLP i ka dorëzuar dosjet e vlerësimit pranë Komisionit të Pavarur të Kualifikimit, me qëllim që të nisë sa më parë nga puna me rivlerësimin e tyre. Tani pritet që raportet për pjesën e mbetur të kandidatëve të miratohen brenda ditës së enjte. Ishte vetë kryetari i Këshillit të Lartë të Prokurorisë, Genti Ibrahimi ai i cili deklaroi në një intervistë mediatike që afati i fundit për hartimin e akteve të prokurorëve që aspirojnë të jenë pjesë e Prokurorisë së Posaçme është data 6 qershor.
Mes emrave për të cilët nuk është miratuar akoma dosja e vlerësimit nga ana e KLP mund të përmendim prokurorët Besim Hajdarmataj, Donika Prela, Elida Kackini, Dorina Bejko, etj.
Në veting Nakuçi dhe Cena
Teksa gjysma e kandidatëve për Strukturën e Posaçme Antikorrupsion janë ende në pritje të dosjeve të KLP, Komisioni i Pavarur i Kualifikimit nuk ka humbur kohë dhe ka futur në veting dy prej prokurorëve për të cilët Këshilli i Lartë i Prokurorisë i ka dorëzuar tashmë aktet e vlerësimit. Më konkretisht, bëhet fjalë për prokurorin e Krimeve të Rënda, Ened Nakuçi dhe prokurorin e Dibrës, Shkëlzen Cena, i cili aktualisht është transferuar tek Prokuroria e Tiranës. KPK i ka mbyllur të gjitha hetimet për dy prokurorët në fjalë dhe tani është gati për t’i thirrur në seancë dëgjimore. Seanca për Shkëlzen Cenën do të zhvillohet ditën e nesërme në orën 09:30.
“Subjekti: Z. Shkëlzen Cena, prokuror në Prokurorinë pranë Gjykatës së Shkallës së Parë Dibër. Vendi: Pallati i Koncerteve (ish-Pallati i Kongreseve), Salla B, Kati 0. Trupa Gjykuese: Firdes Shuli, Lulzim Hamitaj, Brunilda Bekteshi”, njoftoi KPK. Ndërsa seanca për Ened Nakuçin do të mbahet të enjten në orën 12:00. “Subjekti: Z. Ened Nakuçi, prokuror në Prokurorinë pranë Gjykatës së Shkallës së Parë për Krimet e Rënda Tiranë.
Vendi: Pallati i Koncerteve (ish-Pallati i Kongreseve), Salla B, Kati 0. Trupa Gjykuese: Xhensila Pine, Valbona Sanxhaktari, Roland Ilia”, thuhet në njoftimin e KPK. Fakti që Komisioni i Pavarur i Kualifikimit ka nisur të zhvillojë seanca dëgjimore me kandidatët e SPAK do të thotë se gjatë gjithë qershorit ata do të kalojnë në “sitë” dhe do të merren vendimet për konfirmimin ose shkarkimin e tyre. Në këtë mënyrë mbyllet faza kryesore e punës për ngritjen e SPAK, çka do të thotë se kjo strukturë mund të jetë gati brenda korrikut.
Duhet theksuar fakti se katër prej kandidatëve tashmë kanë kaluar në veting. Bëhet fjalë për kryeprokuroren e Krimeve të Rënda, Donika Prela, dy prokurorët e Krimeve të Rënda, Besnik Muçi dhe Dritan Prençi dhe për prokurorin e Prokurorisë së Përgjithshme, Arben Kraja.
Kujtojmë që Genti Ibrahimi ka deklaruar se SPAK mund të nisë nga puna edhe me më pak se 10 prokurorë. Katër prokurorë janë gati, tani mbetet të priten rezultatet për emrat e tjerë që do të hyjnë në veting tani së afërmi.
Mimoza Ibra