Debate të forta në mbledhjen e radhës në Komisionin Qendror të Zgjedhjeve, ku është rrëzuar kërkesa për regjistrimin e komisionerëve të PD dhe LSI në zgjedhjet lokale të 30 qershorit 2019.
Me 4 vota kundër dhe 1 pro është rrëzuar kërkesa e opozitës, duke e përjashtuar kështu nga procesi zgjedhor për zgjedhjet e 30 qershorit. Në përfundim të mbledhjes, Kaso tha se PD do të ndjekë rrugën ligjore.
“Është një e drejtë që na buron nga e drejta kushtetuese. Pika 5 e Kushtetutës e detajon që një parti parlamentare ka të drejtë të çojë anëtarët e saj në KQZ, 30 ditë para ditës së zgjedhjeve, dhe KQZ është e detyruar t’i pranojë. Paligjshmëritë janë të paimagjinueshme. Mazhorancën e ka zënë tmerri. Edhe kur garon e vetme, manipulon dhe vjedh. Do t’i ndjekim hap pas hapi të gjithë atë që parashtron ligji. PS ka 4 anëtarë të propozuar në kundërshtim me ligjin.” – u shpreh Kaso.
Gjatë mbledhjes nuk mungoi debati, ku Ivi Kaso, përfaqësues i PD në KQZ tha se PD ka të drejtë të ketë komisionerë dhe listoi shkeljet që sipas PD, KQZ ka bërë me regjistrimin e Partisë Bindja Demokratike.
Ai shkoi edhe më tej, kur tha se anëtarët e KQZ janë kërcënuar që të mos lejojnë regjistrimin e komisionerëve të opozitës jo-parlamentare.
Kaso iu bëri thirrje që të regjistrojnë komisionerët, në të kundërt do të përballen me përgjegjësi ligjore. Kjo për Denar Bibën, anëtar të KQZ, ishte një shantazh i rëndë.
Debatet në KQZ:
Ivi Kaso: Opozitë fasadë për të zëvendësuar opozitën e vërtetë. Është një proces zgjedhor i mbushur me paligjshmëri, që në më shumë se gjysmën e bashkive ofron një kandidaturë të vetme. Eksponentë të mazhorancës kanë kërcënuar Komisionin Qendror të Zgjedhjeve që të mos regjistrojë komisionerët tanë. Anëtarët e KQZ të mos bien pre e presioneve. Ju paralajmëroj se nëse nuk udhëhiqeni nga ligji, do të ballafaqohet me forcën e ligjit dhe me përgjegjësi penale në rast të shpërdorimit të detyrës. Ligji është i qartë dhe nuk mund të bëhet objekt debate.
Denar Biba: Na shantazhove. Ishte shume e rëndë dhe e ulët. Është hera e parë…
Ivi Kaso: 30 ditë përpara zgjedhjeve kemi të drejtë të plotësojmë vakancat. Duhet të monitorojmë procesin zgjedhor. Ka ankesa e denoncime. KZAZ janë të mbushura me paligjshmëri, me qëllim të qartë të partisë shtet, e cila dhe e vetme në garë shkel afatet e deri tek emërimi i një opozite fasadë. Krijojnë përshtypjen sikur do të ketë zgjedhje. Ky kryeministër nuk garanton dot zgjedhje as kur garon e vetme. Ne po ushtrojmë një të drejtë ligjore për komisionerët.
Eridjan Salianji, PS: I do për të bërë detyrën, apo si vëzhgues?
Kaso: Duam anëtarë në KZAZ, kjo është e qartë. Kandidaturat tona janë serioze. Me eksperiencë të mëparshme zgjedhore
Salianji: Procesi zgjedhor ka afate. Që të jesh subjekt zgjedhor duhet të jesh regjistruar. Pastaj të lindin të drejtat për marrjen pjesë në proces.
Kaso: Komisionerët përcaktohen përpara se partitë të regjistrohen në zgjedhje.
Komisioni Qendror i Zgjedhjeve, ka refuzuar miratimin e komisionerëve të PD dhe LSI për KZAZ-të.