Në Shqipëri ekziston liria fetare dhe kjo duhet mbrojtur me mjaft kujdes, pasi është pjesë e të drejtave të njeriut. Shqiptarët kanë treguar gjithnjë se kanë një vëllazëri kombëtare përballë gjuhës amtare dhe një mozaik të rëndësishëm multi-fetarë.
David Hosaflook, Drejtor i Institutit për Studime Shqiptare dhe Protestante, gjatë një interviste për Agjencinë Telegrafike Shqiptare, veçon si një moment tejet të rëndësishëm historik të kësaj bashkëjetese fetare në vendin tonë, Kongresin e Manastirit.
Sipas tij, ky Kongres, ishte një provë në sytë e botës perëndimore se vendi ynë mund të ishte i bashkuar dhe prej andej, më pas erdhi dhe pavarësia e Shqipërisë në vitin 1912.
“Prej vitesh Shqipëria njihet të ketë një mozaik multi-fetar. Diçka që është vlerësuar shumë nga të huajt, pasi edhe pse në Shqipëri ka pasur përpjekje politiko fetare gjatë viteve, për të përçarë shqiptarët në linja fetare, por shqiptarët në vetvete kanë treguar, kanë theksuar vëllazëri kombëtare të bazuar në gjuhën e përbashkët”, tha Hosaflook.
“Kongresi i Manastirit ishte shumë i rëndësishëm në këtë drejtim, një larmi fetare në sytë e botës. Komisioni prej 11 vetash që caktuan alfabetin shqiptarë, ishte i përbërë nga ortodoksë, katolikë, myslimanë, bektashi dhe protestantë, që tregon një larmi fetare të bashkuar në një tryezë për një qëllim të përbashkët, një moment shumë i rëndësishëm në sytë e botës perëndimore, pasi shqiptarët ishin para një prove të madhe: A do ishin të bashkuar për një çështje kaq të rëndësishme si alfabeti? Shqiptarët treguan se ishin të bashkuar pavarësisht besimit fetarë dhe pas këtij momenti të rëndësishëm erdhi dhe pavarësia e Shqipërisë në vitin 1912. Pra ai Kongres ishte një mesazhi rëndësishëm politik dhe fetarë i shqiptarëve drejt botës perëndimore”, tha Hosaflook.
Sipas tij, liria për të besuar në Shqipëri është një element shumë i rëndësishëm që duhet vlerësuar.
“Shqiptarët ndër vite mund të kenë pasur vështirësi të shprehin lirisht besimin e tyre fetarë, veçanërisht në kohën e komunizmit, por dhe më parë. Sot, duhet të theksoi se në Shqipëri ekziston një liri fetare që duhet mbrojtur si një pikë e rëndësishme për të drejtat e njeriut”, u shpreh ai.
Burimi: http://ata.gov.al