Nga Av. Romeo Kara
Vendi ka nevojë të dalë nga pengamarrja e elitës politike, e cila për interesat e saj meskine, ka çuar këtë vend dhe popullin në katastrofë.
Katastrofa është kthyer në një stafetë pa limit, në të cilën palët në dukje kundërshtare, pasojnë njëra-tjetrën.
Kriza fillon dhe mbaron tek politika, dhe morali i politikës fillon dhe mbaron tek raporti i saj me drejtësinë.
Vlerësuar nga veprat dhe jo nga fjalët, e gjithë politika është bërë për t’u rrëfyer tek prifti dhe për t’u lutur për shpirtin e saj.
Politikanët tanë, kur kalojnë në shkallën sipërore të retorikës mashtruese, shprehen: shqiptarët janë një popull i zgjuar. Kjo sepse për t’a shqiptarët janë të zgjuar për aq kohë sa ata mbajnë mbi kurriz këtë kastë politike.
Në fakt një nga ilumististët e parë, njëkohësisht poet dhe dijetar i Rilindjes Europiane, Petrarca, e ka definuar qartë se: I mencuri ndërron mendim, ndërsa torollaku i bie pas vetëm mendjes së tij.
Vetë partitë politike, nuk janë gjë tjetër, përvecse një mendim i organizuar politik, që do të thotë se, është mencuri edhe ndërrimi i tyre kur e lyp nevoja.
Stabiliteti i kësaj politike antinjerëzore dhe antishqiptare, është vetëm stabiliteti i krimit.
Politikës duhet t’i lëvizë toka nën këmbë nga kërkesat për ndryshim dhe jo nga presionet për pazare.
Sa më shpejt t’a kuptojmë se ka ardhur koha për një ndryshim rrënjësor të politikës, aq më mirë është për ne.
Më mirë të veprojmë si të mencur se si torollakë.
Petrarca e ka dhënë mesazhin edhe për ne.