Pas koalicionit të Partisë Socialiste me 21 parti, një tjetër koalicion është regjistruar sot në Komisionin Qendror të Zgjedhjeve me 7 parti me emrin “Shpresa për Ndryshimin”. Ky është koalicioni opozitar që regjistrohet në KQZ përballë mazhorancës.
“Të vetëdijshëm se rruga e vetme kushtetuese për përtëritjen dhe zhvillimin e një shoqërie demokratike është pjesëmarrja në proceset e saj zgjedhorë, të shqetësuar se rrethanat politike të tanishme në Shqipëri po ndikojnë për krijimin e një klime mosbesimi në vlerat e institucioneve demokratikë, ne si një grup i partive politike opozitare kemi vendosur së bashku për të marrë pjesë në zgjedhjet e ardhshme vendore si koalicion me emërtimin ‘Shpresa për Ndryshimin’.
Nëpërmjet kësaj letre, partitë politike të poshtëshënuara po i drejtohen Komisionit Qendror të Zgjedhjeve për regjistrimin e tyre si koalicion në zgjedhjet e ardhshme vendore” thuhet në kërkesën e partive. Ndërkohë që opozita PD, LSI dhe partitë e tjera nuk janë regjistruar në zgjedhjet lokale, pasi kërkojnë më parë një qeveri tranzitore për të përgatitur zgjedhjet lokale dhe politike të parakohshme.
PARTITË
Aleanca Kuq e Zi
Bashkimi Liberal Demokrat
Demokracia e Re Europiane
Aleanca Popullore
Partia Balli Kombëtar
Partia Emigracioni Shqiptar
Partia Ora e Shqipërisë