Gjermania duket se i ka vënë vizën presidentit Ilir Meta. Pak ditë më parë gazeta tregoi se si raportuesi për Shqipërinë në Bundestagun gjerman shmangu LSI, ndërsa dje ka qenë kancelarja Angela Merkel, ajo e cila ka shmangur presidentin Meta. Dje u mbajt Samiti i Berlinit dhe ajo që ra në sy ishte fakti se Kosova, Serbia, Mali i Zi dhe Bosnja u përfaqësuan nga kryeministrat dhe presidentët.
Por Shqipëria e Maqedonia u përfaqësuan vetëm nga krerët e qeverisë, pasi presidentët Ilir Meta dhe George Ivanov nuk ishin ftuar. Shmangia e tyre në këtë takim kaq të rëndësishëm do të thotë shumë. Por pyetja që shtrohet është se çfarë e bashkon Metën me Ivanovin? Pse Berlini u ka vënë vizën të dyve? Ajo që kanë të përbashkët kryesore është influenca ruse. Ivanov është njeri i Moskës dhe kjo nuk ka asnjë dyshim.
Ai u vu president nga Nikolla Gruevski dhe sa ishin të dy në pushtet, Moska shtriu ndjeshëm tentakulat në Shkup. Por dhe presidenti shqiptar nuk mbetet pas në këtë aspekt. Reagimet e ambasadës ruse, të vetë Metës dhe të mediave ruse e dëshmojnë qartë se Moska e ka në anën e saj presidentin shqiptar. Vetë Meta deklaroi pak ditë më parë se nuk është Rusia problemi më i madh i vendit, ndërsa ambasadori rus e mori disi në mbrojtje atë dhe sulmoi kryeministrin Rama. Po ashtu, mediat ruse bëjnë lajm çdo deklaratë të presidentit.
Edhe pse çdokush mund të mendojë se mund të jetë rastësor lënja jashtë e Metës dhe Ivanovit, nuk është ashtu. Qëllimi i samitit ishte ndryshimi i kufijve Kosovë-Serbi. Meta është ndër të flaktit që ka dalë kundër dhe është rreshtuar krah Gjermanisë.
Por pavarësisht kësaj Merkel ka thirrur Ramën dhe ka lënë në shtëpi presidentin shqiptar, duke dëshmuar dhe një herë se ndërkombëtarët i kanë vënë vizën e kuqe presidentit dhe familjes së tij.
Lufta e Metës dhe Kryemadhit me ndërkombëtarët
Presidenti Ilir Meta ditët e fundit i ka sulmuar shumë ashpër ndërkombëtarët, ndërsa Monika Kryemadhi ka akuzuar rëndë diplomatët gjermanë. Sulmet e saj ndaj Knut Fleckenstein dhe ambasadorit të OSBE janë shumë të ashpra. Po ashtu vetë Fleckenstein pak javë më parë e deklaroi hapur se Zonja e Parë nuk e do integrimin. Në takimet e djeshme Merkel e tregoi qartë se prioritare për të, është reforma në drejtësi.
Por presidenti Meta dhe partitë opozitare po e sulmojnë procesin. Për ndërkombëtarët këto sulme janë të papranueshme. Meta është shprehur se reforma është kapur, ndërsa Kryemadhi dhe deputetët e saj kanë qenë shumë të ashpër në reagime, duke treguar nga ana tjetër se janë trembur nga SPAK e BKH. Pra, nëse bëhet një analizë e zhvillimeve të fundit, Meta ka dalë kundër ndërkombëtarëve në çdo aspekt.
Po sulmon reformën në drejtësi, nuk ka ndërhyrë për krizën politike duke mbështetur destabilizimin e vendit, ndërsa po flirton me rusët. Edhe Ivanov në Maqedoni e ka sulmuar sistemin e drejtësisë dhe po ashtu ka sulmuar ndërkombëtarët, duke ndjekur të njëjtën strategji si Meta. Fakti që Meta u fut në të njëjtën kategori me Ivanov, tregon se ndërkombëtarët po i kundërvihen presidentit e familjes së tij.
I pari ishte deputeti i Bundestagut, Christian Petry, i cili gjatë vizitës në Tiranë nuk takoi Kryemadhin, ndërsa kërkoi që PD të futet në zgjedhje, duke anashkaluar LSI. “Unë përkraha idenë se duhet të ketë pjesëmarrje në zgjedhje, sidomos të Partisë Demokratike”, deklaroi ai. /Kliti Topalli