Dhurata Çupi, shprehet se protestat e opozitës do të vijojnë çdo të enjte deri në zgjidhjen e krizës politike dhe ofrimin e zgjedhjeve të lira e të ndershme. Ajo bën me dije se bllokimi i rrugëve do të shtrihet edhe në Qarkun e Dibrës, ku këtë të enjte në orën 17:00 do të bllokohet rruga në vendin e njohur si kryqëzimi tek Ura e Matit.
“Ashtu siç e ka bërë të ditur kryetari i PD z.Basha dhe opozita e bashkuar, është vazhdimi i protestave në 12 qarqet e vendit që nga 12 shkurti, të cilat janë protestat më të mëdha që ka njohur historia e protestave në Shqipëri si ajo e 13 prillit, ku dhe më skeptikët nuk e kanë mohuar që ishte protesta më e madhe e zhvilluar në vendin tonë.
Qytetarët nuk dalin në tubim, por dalin në një protestë kundër kësaj qeverieë, kundër varfërisë, për paga, për pensione për mungesë investimesh dhe për një mungesë të theksuar vëmendje kundrejt gjithë Shqipërisë, në veçanti kundrejt qarkut Dibër që është lënë i harruar nga kjo qeveri, si në spitale, në infrastrukturë etj. Sikur është bërë publike çdo të enjte do ketë protesta dhe bllokim rrugësh.
Qarku i Dibrës ditën e enjte ora 17:00 do bllokojë kryqëzimin tek ura e Matit. Nga gjithë qarku pritet të ketë një pjesmarrje masive. Jemi në një pikë ku shteti është në krizë. Shteti dhe pushteti janë në një dorë dhe sot nuk ka asnjë normalitet në vendin tonë.
Prandaj e gjithë Shqipëria është ngritur në protestë dhe qytetarët e Dibrës do jenë ne menyre të vazhdueshme çdo të enjte në protestë ashtu dhe në protesten më të madhe që do jetë më 11 maj në Tiranë. Ju bëj thirrje qytetarëve Dibranë që ditën e enjte të jemi të gjithë bashkë për të protestuar.”
Sipas deputetes Çupi me datë 30 qershor nuk do të ketë zgjedhje pa Partinë Demokratike dhe pa opozitën e bashkuar. “PD është opozita shqiptare dhe nuk mund të ketë zgjedhje me një alternativë. Që të zgjedhësh duhet të ketë dy alternativa dhe alternativa opozitare sot në Shqipëri është Partia Demokratike.
Ashtu siç ka ditur dhe siç ka qenë në pushtet për 13 vite, ashtu është e sigurtë që do të jetë në pushtet në vitet që vijnë”.
E pyetur për partinë e re Çupi shprehet: “Partia e re është numri 94 ose 95. Më vjen keq që e ka filluar me probleme me ligjin. Atë që kemi dëgjuar nga kryetari i Komisionit Qendror të Zgjedhjeve, ka ankesa qytetarësh dhe nuk është regjistruar në gjykatë. Më vjen keq që është kompromentuar me zbatimin e ligjit që në ditët e para të saj”.