Kryetari demokrat Lulzim Basha duket se po kërkon “shtigje” më të lehta për të hyrë në zgjedhjet vendore, por dhe për të maksimalizuar votën në funksion të PD dhe të opozitës.
Teksa ka ndjekur precedentin e kryeministrit Edi Rama, i cili kur ishte në opozitë kërkoi dhe arriti të shtynte zgjedhjet lokale nga vjeshta 2006 në pranverë të vitit 2007 për shkak të certifikatave të pasigurta, Basha po kërkon një shtyrje të datës së 30 qershorit.
Ashtu sikurse Rama ia kërkoi një gjë të tillë presidentit të atëhershëm Alfred Moisiu, dhe tani Basha në gjurmët e rivalit të tij politik, po e kërkon një gjë të tillë nga presidenti Ilir Meta.
Por në ndryshim nga Rama që e kërkoi vetë drejtëpërdrejt, Basha këtë gjë e ka bërë sot përmes aleatëve të vegjël, ku mes rreshtave i ka kujtuar Metës se 30 qershorin e kishte dekretuar ai si datë zgjedhjesh dhe ashtu sikurse e dekretoi dhe mund ta shtyjë.
Ka qënë kreu i PDK Nard Ndoka ai që e ka cilësuar këtë datë një moment të rëndësishëm për politikën e opozitën, pasi tashmë e ka të përcaktuar një datë të zgjedhjeve lokale nga Presidenti i Republikës.
Sipas Ndokës 30 qershori për politikën shqiptare është një moment i rëndësishëm, pasi ose do të triumfojnë vlerat reale të demokracisë për t’u kuptuar njëherë e mirë dhe nga kjo mazhorancë që rregullat e lojës vendosen nga dy palë, duke lënë për të kuptuar se kërkohet një opsion tjetër.
Ndoka këmbëngul që ballafaqimi politik është i rëndësishëm për alternativat dhe vlerat e saj dhe jo nga akrobacitë e partive politike.
Aleati i Bashës, duke i kujtuar kreut të shtetit përgjegjëstë jo vetëm për datën e zgjedhjeve por dhe për ndikimin që mund të ketë si një institucion mbi palët, Ndoka ka përcjellë indirekt qëndrimin e Bashës për Metën që dita e zgjedhjeve dhe mund të shtyhet.
Pritet që për të shtyrë zgjedhjet të bien dakord si opozita ashtu dhe mazhoranca, ndërkohë që Rama vijon me këmbëngulje t’i përmbahet zgjedhjeve me 30 qershor, ndoshta dhe për të rritur “pazarin” politik./Pamfleti/