Marrëdhënia mes fëmijëve dhe prindërve në disa raste mund të bëhet shumë e ndërlikuar.
Sociologu i njohur Gëzim Tushi, në një intervistë për “Provokacja” u shpreh se të rinjtë e sotëm urrejnë prindërit në shtëpi dhe mësuesit në shkollë.
Sipas tij një familje nuk mund t’a ndërtojë marrëdhënien me fëmijët vetëm duke dhënë urdhëra. Më tej ai shton se kriza e shkollës ka bërë padrejtësi tek të rinjtë.
“Unë jam partizan i demokratizimit të institucioneve të sigurisë morale, sikur janë shkolla, familja etj. Por për fat të keq tek ne kanë marrë zhbalancime dhe në një farë mënyre është marrë ideja se duke goditur autoritarizmin do zhduket autoriteti. Unë nuk jam për këtë. Institucionet, si familja shkolla por edhe institucione të tjera mbeten institucione të disiplinës.
Kjo do të thotë se asnjë familje nuk mund të funksionojë nëse nuk ka njëlloj disipline të brendshme organike, jo patriarkale, jo vertikale, jo maskiliste por horizontale. Por ne e kemi të vështirë ta ndërtojmë këtë autoritetin e horizontalizmit, qoftë në familje qoftë edhe në shkollë.
Kriza e shkollës ka bërë padrejtësi tek të rinjtë tanë se dy figurat që ata urrejnë më shumë janë prindërit në familje dhe mësuesit në shkollë. Ata nuk i shikojnë dot fare sepse janë figura që kërkojnë disiplinë dhe njëlloj autoriteti funksionues”,- tha sociologu. /CNA.al