SHBA dhjetëra milionë USD mjete dhe pajisje ushtarake për Shqipërinë, ndihmat e radhës mbahen sekret, krerët e korruptuar të politikës shqiptare kacafyten për pushet dhe për të ndarë pasuritë e fundit publike
Teksa krerët e politikës shqiptare kacafyten për pushtet dhe për të plaçkitur pasuritë e fundit kombëtare, Shtetet e Bashkuara të Amerikës kanë një plan për të kthyer Shqipërinë një fuqi dominuese ushtarake në Ballkan. Plani per ndërtimin e një bazë ajrore të NATO-s në Kuçovë dhe dhurimi i më i fundit i disa helikopterëve të tipit “Black Hawk” për ushtrinë shqiptare nga Departamenti Amerikan i Mbrojtjes, është vetëm një pjesë e planit afatgjatë të SHBA dhe NATO për të fuqizuar ushtarakisht Shqipërinë.
Por, për fatin e keq të shqiptarëve, kjo klasë e korruptuar dhe e degraduar politike, jo vetëm nuk po e kupton kohën dhe rrethanat historike në të mirë të Shqipërisë, por po punon kundër Shqipërisë dhe të ardhmes së saj. Të krimbur moralisht, të zhytur në luks dhe të verbuar nga lufta për pushtet, krerët e politikës shqiptare kanë mbetur në rrjetën e interesave të ngushta dhe shikojnë deri tek vila dhe posti i radhës.
Gjithsesi, situata politike në Shqipëri, e krijuar nga krerët e politikës, nuk i ka stepur amerikanët në mbështetjen e Shqipërisë. Gjatë një mbledhje të Komisionit të Sigurisë Kombëtare, ministrja e Mbrojtjes, Olta Xhaçka ka folur për një ndihmë shumë të rëndësishme të Shteteve të Bashkuara të Amerikës për ushtrinë shqiptare.
Por, Xhaçka, e cila ka qenë ditët e fundit në Pentagon, ka pohuar se nuk mund ta ndajë këtë informacion me asnjë nga anëtarët e Komisionit të Sigurisë, edhe pse ata janë të pajisur me certifikata sigurie.
“Vlen të thuhet që kemi edhe disa projekte në vazhdim. Bëhet fjalë për një ndihmë të qenësishme, disa dhjetëra milionë dollarë, por pritet që aleati ynë strategjik t’i miratojë në të gjitha institucionet e veta në kongres. Kjo nuk është asgjë që mund ta ndajmë me ju sot, por shumë shpejt do të bëhet realitet”.
Me tej, Xhaçka ka folur rreth planit të NATO dhe SHBA për Kuçovën. Ajo ka pohuar se Kuçova do kthehet në bazën më të madhe në rajon, por sërish nuk dha detaje. “Kemi ngritur grupet e punës, të cilët mund të facilitojnë përshpejtimin e hapave që duhet të marrë ndërtimi i bazës së Kuçovës. Do të fillojmë që këtë vit me disbursimin e një pjesë të fondit, bëhet fjalë për mbi 50 milionë euro investim, i cili është vetëm fillestar.
Do të jetë më tepër se sa kaq. Bëhet fjalë për një investim të shtrirë në disa vite dhe në disa faza, është një informacion që nuk mund ta ndaj në detaje, por mund të them se do të fillojmë që këtë vit me masterplanin dhe me projektin për bazën, për të vijuar menjëherë në vitin 2019 me tullën e parë, me fillimin e investimit, të cilit do t’i japim një ritëm shumë të shpejtë, duke e ndjekur me shumë prioritet.
Nëse mundet ta konsiderojmë fond të huaj, edhe ky pa diskutim që është fond i huaj, nuk vjen nga buxheti ynë, por bëhet fjalë për fondet e përbashkëta të NATO-s që investohen në bazën ajrore të Kuçovës. Do të jetë një projekt i një rëndësie të veçantë, jo vetëm për zonën atje, jo vetëm për Kuçovën, jo vetëm për Shqipërinë, por për të gjithë rajonin”./Pamfleti