Nga Anri Bala
Aman si bënë edhe ti! Turfullove nga inati, a thua se e kishe për herë të parë që shihje një shfaqje aq të shëmtuar. Apo e kishe harruar talljen publike që të bëhej çdo ditë! Me faj nuk të bëj dot, por merre pak më shtruar or mik! Nëse do të të ndihmonte ndonjë çik, e di si bëj unë?! Rikthej në mendje pamjet e të gjithë pelivanëve të pushtetin dhe fytyrat e tyre të ngrysura e shtrëmbëruara nga skamja, të thara e pajetë, me faqe të groposura pus, ku mishi i mollzave u mbulonte kafkën me vështirësi. Aty nis e qesh, kur i dëgjoj të thonë se i kanë me “shpatullat” e tyre gjithçka kanë ndërtuar, pa cënuar asnjë qindarkë tonën, e pa e ditur askush, na dalin rracë fisnore pasunarësh e trashëgimtarë të mëdhenj.
Por mos t’ia hamë hakun, Monika nuk të gënjeu aspak! Ajo u tregua më e sinqertë sikur unë e ti jemi mësuar ta shohim dhe unë për herë të parë i besova! Si i beson, do më pyesje ti?! Po kë të besoj thua… se mamaja e zonjës së parë të vendit, bënë vetëm dashuri me babain e zonjës së parë të vendit dhe përveç libidos që kanë për njëri tjetrit… asgjë tjetër nuk ka mes tyre?! Pra Presidenti, me mamanë e zonjës së parë, kanë ndryshuar statusin, për sa kohë janë në pushtet… nga të martuar, në një lidhje të hapur… vetëm sepse Kushtetuta e thotë qartë, se nuk lejohet që dy përsona nga e njëjta familje, të punojnë në të njëjtën ndërmarrje!
Apo të besoj dokrrat e saj, se këta të krahut matanë i paskan “vjedhur” votat e blera?! Këta aq shumë i blejnë votat, sa harrojnë edhe bëmat e tyre kthehen në barsaleta, kur kërkojnë të riblejnë një votë të blerë me çmim më të lartë se ai i pari! Të them të vërtetën, jo se këta që i rrinë përballë janë mall më i mirë, e njëjta “pare kallpe” janë, por do të isha më i prirur t’i besoja mamasë së zonjës së parë, nëse do thoshte: “Më gjeni kush më ka vjedhur votat e mia të blera?!” Nëse do thoshte kështu, jazëk më qoftë nëse nuk i’a jap votën… xhaba.
Por për t’i paraprirë kësaj, një dorë ndihmë do ja kisha dhënë zonjës për t’ia treguar hajdutin, se helbete nga humbja e vigjilencës nuk ja pret mendja, që votat e saj të blera, i’a ka vjedhur pikërisht Luli, “karafili” hollandez, kryeministri i ri i mbetur në tentativë, naltmadhënia e SHQUP-it… me të cilën shumë shpejt mamaja e zonjës së parë do të hyjë në koalicion… e prej këtij bashkimi do të ngjizet “qeveria tranzitore”, që do t’ia ruaj apo do t’ia “rruaj”…votat, siç bëri herën e fundit me ministrin e tij “Rambo II” i përkohshëm, e këtë do na duhet ta shikojmë.
Ama një gjë është e sigurtë, se Luli është i prirur të ta “rruaj” votën, sepse ka një precedent, që asnjë kryetar partie në botë nuk e ka bërë si ai: “Është i vetmi lider partie, që pas shkërmoqjes në zgjedhjet parlamentare, ngriu veten… për ta shkrirë sërish me votat që i’a grabiti demokratëve”, praktikisht është aq i sëmurë për të vjedhur, sa arrin të vjedh në “shtëpinë” e tij…imagjino ç’mund t’i bëj “karabinas” së Monikës.
Siç edhe të thashë, Monika nuk na gënjeu kur u betua se: “Nëse unë, Monika Kryemadhi, kam marrë 1 qindarkë, jo ty, por çdo shqiptari që i kam dhënë dorën dhe e kam ndihmuar, helm mu bëftë tek fëmijët e mi! Fëmijët e mi jetojnë në saj të shpatullave të mija, prindërve të mi dhe të babait të tyre”.
Nuk gënjeu kur u betua, se në jetën e saj ajo s’ka prekur asnjë qindarkë nga paratë e atyre, që u ka dhënë dorën e i ka ndihmuar… por u ka marrë gjithçka, edhe bukën e fëmijëve, atyre që e kanë për turp e ndjejnë neveri tu japin dorën. Krejt e paturp, i tregonte nënës së katër fëmijëve, se çdo bënte me lekët e asistencës, që i’a kishte hequr partia e saj: “Veç bukë të thatë do hante”, e prandaj i’au hoqi dhe atë kafshatë, duke gjykuar me matësin e stomakut të saj, që nuk ka vend bosh, se… nuk i duhej./Ekskluzive.al