Shkencëtari dhe fizikani i famshëm vdiq në moshën 76 vjeçare pas një beteje të gjatë me një sëmundje të neuroneve.
Dhe pavarësisht se mund të fliste vetëm përmes një kompjuteri dhe nuk mund të lëvizte, profesori Hawking përhapi dijen e tij deri në vdekje.
Në një nga paraqitjet e fundit më herët këtë muaj, ai tregoi teorinë e tij se çfarë besonte ai se kishte para fillimit të kohës – çfarë ndodhi para Big Bengut, transmeton Gazeta Express.
Duke folur me fizikanin Neil DeGrasse Tyson, ai tha:
“Gjendja kufitare e universit është se… ai s’ka kufij”.
Me fjalë të tjera, Hawking thoshte se koha nuk ekzistonte para ndodhisë së Big Bengut.
Para krijimit të universit, koha ishte e shtrembëruar dhe ekzistonte në një “gjendje të lakuar”.
Hawking kishte shpjeguar teorinë e tij edhe më parë, duke thënë:
“Meqenëse ngjarjet para Big Bengut nuk kanë pasoja vëzhguese, mund t’i heqim ato nga teoria dhe të themi se koha filloi me Big Bengun.
Ngjarjet para Big Bengut thjeshtë nuk janë të përcaktuara, sepse nuk ka asnjë mënyrë që të matet ajo çfarë ndodhi me to”.
Hawking besonte se jeta në Tokë lehtë mund të shuhet. Ai pati thënë se “njerëzit duhet ta braktisin Tokën brenda 200 viteve, nëse dëshirojmë të mbijetojnë”.
Ky ishte paralajmërimi i Hawking disa muaj para vdekjes së tij. Fizikani legjendar besonte se jeta në Tokë mund të zhduket nga një fatkeqësi si një goditje asteroidi, Inteligjenca Artificiale ose pushtimi nga alienët.
Ai paralajmëroi gjithashtu se mbipopullimi, agresioni njerëzor dhe ndryshimi klimatik mund të bëjnë që njerëzimi të vetë-zhduket.