Gjatë takimit në Rumani të “B4”, të katër vendeve alëeate ballkanike Bullgaria, Rumani, Serbia dhe Greqia, kryeministri grek Aleksis Tsipras u takua edhe me presidentin serb Aleksandër Vuçiç.
Ai dha mesazhe për Shqipërinë, duke cekur, sipas tij, zhvillime negative në raport me pakicat greke në Shqipëri.
Kryeministri grek nuk e ka bërë të ditur saktësisht se për çfarë zhvillimesh bëhet fjalë, por mendohet se ai i referohet shqetësimeve të minoritetit grek për pronat në bregdet.
Lidhur me këtë, Tsipras tha se Greqia mund të bllokojë negociatat e Shqipërisë me BE.
““Kohët e fundit po shikojmë zhvillime që nuk na pëlqejnë. Sot mësova që ka pasur një zhvillim negativ në lidhje me minoritetin grek.
Nëse është e vërtetë, do të jetë një zhvillim shumë negativ. Një çështje që fatkeqësisht neve nuk na jep optimizëm drejt perspektivës europiane.
Nëse informacioni që kemi është i vlefshëm, nuk ekzistojnë parakushte për të ecur në këtë drejtim.
Shpresoj të jem i gabuar. Sepse dëshira e të gjithëve është që hapat drejt perspektivës evropiane të bëhen realitet.
Por, ne çdo shtet e shikojmë veç e veç”, tha ai.”, ka thënë Tsipras dhe vuri në dukje se pritet që të jetë një zhvillim negativ.
“Ne jemi B4 e Ballkanit, ne jemi të katër vendet e Ballkanit që kanë dëshirën absolute për të ecur përpara në bashkëpunim të ngushtë për të përfituar zhvillim, bashkëpunim, paqe dhe prosperitet për popujt tanë”, ka thënë kryeministri grek Tsipras.
Sipas mediave greke, Tsipras i referohej një informacioni që kishte marrë se konkretisht qeveria shqiptare ka konfiskuar prona të minoritetit grek në Himarë përmes një vendimi të botuar në Fletoren Zyrtare.
Ai mes tjerash tha se këto informacione duhet të verifikohen dhe nëse prej tyre del se gjithçka është e vërtetë, atëherë Greqia do të bëhet pengesë për hapjen e negociatave të Shqipërisë me Bashkimin Europian, proces ky që pritet të ndodhë gjatë muajit qershor.