Një ditë pasi Sali Berisha denoncoi se në Kongresin e Partisë Socialiste mori pjesë edhe një ish-polic i cili ishte arrestuar për trafik kanabisi ka reaguar edhe Gjergj Dodani.
Dodani, mohon akuzat e bëra nga ish-kryeministri Sali Berisha dhe sqaron arsyet pse mori pjesë në Kongresin e Socialistëve.
Dodani thotë se ka shërbyer për 26 vite në Policinë e Shtetit dhe ka qenë një nga inspektorët e dalluar të Policisë së Shtetit. Ai akuzon ish-ministrin e Drejtësisë, Ylli Manjani si një nga urdhëruesit e arrestimit të tij.
Ish-polici shton se gjykata e ka pushuar çështjen në ngarkim të tij dhe se pret vendimin për dëmshpërblimin me rrogë.
“Unë jetoj në një zonë ku dominon PD, që e ka marrë pushtetin me dhunë dhe me poshtërsi. Me hajdutët e zonës. Patjetër janë prishur interesat, mund t’ja ketë çuar Berishës. Duhet të merret me punët e tij se i ka duart e lyera me gjak. Mbasi prisha interesat e PD dhe LSI më futi në burg Ylli Manjani. U arrestova me urdhër të Ylli Manjanit sepse iu kam shkulur parcelat me drogë të tij dhe Berishës. Pasi dhashë këtë informacion, Manjani dha urdhër të më arrestonte. Drejtësia më dha pafajësi të plotë me pushim të dosjes. Në gjykatën Administrative kam kërkuar rrogën dhe jam vetë i shtatë pa punë. P****ët e Lulit, Monikës dhe Berishës nuk i dëgjoj. Nëse unë do denoncoja në prokurori kush do të më jepte mua të drejtë?”, shprehet ai për Dosja.al.
Ai tregon edhe arsyet pse mori pjesë në kongresin e PS. Dogani thotë se pjesëmarrja nuk ka lidhje me partitë politike, por me një ankesë të zgjidhur në platformën për bashkëqeverisjen, Shqipëriaqëduam, lidhur me hipotekën e shtëpisë së tij.
“Unë kam qenë një nga qytetarët që ka shkruar tek Shqipëriaqëduam për dokumentet dhe hipotekën. Isha një nga qytetarët e përzgjedhur. Nuk jam pjesë e Partisë Socialiste dhe asnjë partie. Kam qenë në polici, 26 vite në Polici dhe nuk njoh as vërejtje dhe ndëshkime vetëm përgëzime dhe falënderime”