Partia Demokratike dhe Lëvizja Socialiste për Integrim po pësojnë dështime të njëpasnjëshme në misionin e tyre për të rrëzuar qeverinë. Basha e Kryemadhi deklaruan se pas djegies së mandateve do shkohet te protestat e mosbindja civile, duke paralizuar Parlamentin e qeverinë. Por gjithçka deri më tani ka rezultuar flluskë sapuni.
Dje opozita zhvilloi protestën e radhës para Parlamentit, me shpresën se do bllokohej puna e këtij institucioni. Të mërkurën të gjithë militantët u porositën që të bllokonin hyrjet e Parlamentit nga të gjitha anët, por nuk ndodhi kështu. Një numër i reduktuar protestuesish u mblodhën para Parlamentit dhe tentuan disa herë të futeshin brenda duke shtyrë policinë. Këtë herë forcat e rendit shmangën gazin lotsjellës dhe e mbajtën shumë lehtë nën kontroll turmën.
E reja e vetme e protestës së djeshme ishte se drejtohej nga Berisha e Kryemadhi. Basha ndodhej në Bruksel dhe nuk ishte i pranishëm. Por njerëzit e tij, ai i kishte porositur që të mos lejonin asnjë skenë dhune. Edhe Berisha e Kryemadhi prej muajsh flasin për terror e destabilizim, duket se Basha e njerëzit pranë tij janë distancuar. Dje u tentua sërish të shkohej te skenari maqedonas duke u futur në Parlament, por edhe këtë herë dështoi. Deputetët u futën lehtë në sallë dhe Parlamenti vijoi punën qetësisht.
Pati vetëm disa flakadanë dhe shtyrje të forcave të rendit, por asgjë tjetër. Si duket thirrjet e ndërkombëtarëve kanë detyruar liderët e opozitës që të tërhiqen nga skenarët e dhunës. Por ndryshe nga sa u deklarua më 26 shkurt, protesta kohët e fundit është kthyer në një tur shëtitjeje nëpër rrugët e Tiranës.
Para 3 javësh Basha e tërhoqi turmën nga Parlamenti te Komisioni Qendror i Zgjedhjeve. Më 26 mars pati rrotullime rreth Kryeministrisë dhe marshim drejt Parlamentit. Ndërsa dje turma e la Parlamentin pak pas mesditës dhe u drejtua te Drejtoria e Policisë së Tiranës. Efektivët shoqëruan disa persona dhe ky ishte argumenti që turma u zhvendos aty. Më pas protestuesit u zhvendosën te selia e PD dhe aty e mbylli protestën Edi Paloka, i cili mbajti një fjalë rasti në mungesë të Bashës.
Skenarët e Berishës
Zhvendosja dje e protestës para komisariatit të policisë është një skenar i njohur në historinë e Shqipërisë. Të gjithë ata që kanë përjetuar periudhën 1997-2002 e dinë se këtë strategji e ndiqte Sali Berisha. Në atë kohë ai ishte në opozitë dhe sa herë që arrestoheshin militantë të PD rrethoheshin komisariatet.
Por dy ngjarjet që mbahen mend nga të gjithë janë ajo e Bajram Currit dhe ajo e Shkodrës. Më 22 shkurt 1998, militantët e PD rrethuan komisariatin e Shkodrës dhe 35 të burgosur u liruan. Një skenar i ngjashëm ndodhi më 28 nëntor të vitit 2000. Militantët e PD rrethuan komisariatin e Bajram Currit dhe u përleshën me policinë, ku mbetën dhe persona të vdekur. Po ashtu dhe në shumë raste të tjera u sulmuan dhe u rrethuan komisariatet.
Ajo që ndodhi dje duket se ishte një strategji e Berishës për ato kohë. Por dje turma thjesht bllokoi rrugën dhe më pas për rreth gjysmë ore u largua. Edhe pse i ngjante një skenari të përdorur shumë herë nga Berisha, ish-kryeministri e ka kuptuar se skenat e viteve 1998 nuk vlejnë më sot. Askush nuk vjen dot në pushtet me dhunë. Por ndryshe nga ajo kohë, sot kushdo ë sulmon institucionet ndëshkohet. Megjithatë Berisha po jep sinjale se do të kthejë vitet ’97- ’98, por nuk ka pas vetes Lulzim Bashën. /Kliti Topalli