Komisioni Qendror i Zgjedhjeve pritet të vendosë nesër më 20 mars dhënien e mandateve për deputetë të tre kandidatëve nga lista e LSI ndërsa do të shpallë formalisht të pazgjedhshëm për shkak se nuk kanë plotësuar formularin e dekriminalizimit 14 kandidatë demokratë dhe 4 të LSI. Tre deputetë të rinj të LSI pritet të marrin mandatin.
Vendimet e së mërkurës përbëjnë edhe raundin e dytë të ofertave për mandat deputeti nga ana e KQZ për plotësimin e vakancave të krijuara nga dorëheqja në masë e deputetëve të opozitës në fund të muajit shkurt. Nga raundi i parë, tre kandidatë të PD dhe gjashtë të LSI pranuan mandatet.
Gjithsej 41 nga 43 deputetë të Partisë Demokratike u tërhoqën nga parlamenti dhe dorëzuan mandatet bashkë me 17 nga 18 deputetët e LSI. Nga PD vijojnë të mbeten 38 vakanca në parlament ndërsa nga LSI kanë mbetur 8 deputetë pa u zëvendësuar ende.
Dy partitë parlamentare të opozitës, PD dhe LSI, tërhoqën deputetët e tyre nga Kuvendi i Shqipërisë si pjesë e planit të tyre për të shpallur maxhorancën qeverisëse ilegjitime. Ata kërkojnë rrëzimin e qeverisë së kryeministrit Edi Rama dhe zgjedhje të parakohshme. Qeveria thotë se nuk ka ndër mend të tërhiqet dhe se parlamenti mund të vijojë të funksionojë edhe pa opozitën. Ajo ka bërë thirrje publike për bisedime me deputetët e rinj, të cilët janë shpallur si tradhtarë nga opozita pavarësisht se vijnë nga listat e saj, për të arritur një reformë zgjedhore. Votat e deputetëve zëvendësues mjaftojnë për të arritur kuorimin e nevojshëm prej 84 votash për të bërë ndryshime në ligjet me shumicë të cilësuar, të tilla si Kodi Zgjedhor, Kodi Civil apo Kodi Penal.
Mposhten ligjësitë e arithmetikës
Kujtim Gjuzi, banor i Tiranës, me profesion të vetëdeklaruar ekonomist biznesi, i ditëlindjes 1959, është kandidati i 19 i Partisë Demokratike në qarkun Durrës. Në vitin 2017 në këtë qark u zgjodhën 14 deputetë nga tre partitë kryesore në vend. Megjithëse i fundit në listën e një partie që në qarkun Durrës mori vetëm 4 deputetë, Gjuzi ka deklaruar publikisht se ai do ta pranojë mandatin dhe aktualisht ka shumë gjasa që kjo gjë do të ndodhë.
Aktualisht katër deputetët e PD-së së Durrësit kanë dhënë dorëheqjen ndërsa dy të tjerë, përfshirë Agron Dukën, i cili garoi te listat e PD por është kryetar i një partie aleate, janë shpallur formalisht nga KQZ të pazgjedhshëm.
Në çdo rast, duke qenë se KQZ ka detyrimin të njoftojë kandidatët pasues në listë për detyrimin e plotësimit të formularit të pastërtisë së figurës, procedurë për të cilën kandidatët kanë dhjetë ditë kohë, ezaurimi i të gjithë listës së PD-së do të kërkojë edhe së paku disa muaj deri sa t’i vijë radha Gjuzit. Në listën e kësaj partie janë ende 12 kandidatë për katër mandate deputetësh para se të vijë rradha e fundit të listës.
Situata në qarqet e tjera është e ngjashme. Partia Demokratike ka publikuar një listë me 139 emra kandidatësh, të cilët i janë bashkuar 39 deputetëve të dorëhequr. Por së paku njëri prej tyre, Alban Zeneli i Kukësit, e mori mandatin pasi e kishte refuzuar publikisht një herë.
Që nga viti 2008, kur ish-kryeministri Sali Berisha dhe Edi Rama, në atë kohë kryetar i Partisë Socialiste në opozitë, ranë dakord me njëri-tjetrin dhe krijuan sistemin aktual zgjedhur, shumë kanë vrarë mendjen se çfarë kuptimi mund të ketë të garosh në vend të 19 në listën e një partie që nëse fiton 100% të zgjedhjeve, mund të marrë 14 deputetë.
Megjithatë, kjo ligjësi e arithmetikës u mposht gjatë mandatit parlamentar 2013-2017 nga ana e Partisë Socaliste në qarkun Lezhë, ku nga tetë kandidatë të saj, dy u shpallën fitues, gjashtë dhanë dorëheqjen pasi morën mandatin (përfshirë dy fituesit), ndërsa dy u tërhoqën pa e marrë mandatin.
Por është dorëheqja në masë e deputetëve demokratë ajo që mund ta thyejë edhe më tej arithmetikën elementare zgjedhore.(BIRN)