Rihapja e dosjes “Hajdari” është shumë pranë. Ditën e djeshme në Gjykatën e Apelit të Tiranës u zhvillua seanca e radhës gjyqësore, ku u mor në shqyrtim kërkesa e Izet Haxhisë për tu rigjykuar. Gjatë seancës nuk munguan deklaratat tronditëse të Haxhisë kundër ish-kryeministrit Sali Berisha. Dikur truproja e tij, dje Izet Haxhia e akuzoi Berishën se ka manipuluar hetimin e vrasjes së ish-deputetit demokrat, Azem Hajdari.
Sipas tij, ish-kryeministri ka vënë njerëzit e tij të besuar tek grupi hetimor që u mor me hetimet pas atentatit ndaj Hajdarit, duke i dhënë kështu një rrjedhë tjetër ngjarjes. Duke kërkuar që të dëgjohet fjala e tij, Izet Haxhia paralajmëroi se ka në dorë prova të reja që do të zbardhin të vërtetën e ngjarjes dhe rolin e Berishës në të. “Deri më sot nuk jam dëgjuar. Unë jam dëshmitar i dorës së parë. Jam dënuar në mungesë me 25 vite nga një gjyq i montuar nga Sali Berisha dhe është e drejta ime të paraqes provat e mia.
Kjo është shndërruar në një çështje politike sepse akuzuesi kryesor i imi është Sali Berisha. Ai përcaktoi edhe anëtarët e grupit hetimor kur ndodhi ngjarja. Unë kam në dorë prova që zbulojnë edhe rolin e Berishës në ngjarje. Prandaj kërkoj të dëgjohem dhe të rigjykohem”, tha Izet Haxhia para trupës gjyqësore të deleguar nga KLGJ, të përbërë nga anëtarët Dhimitër Lara, Sokol Binaj dhe Nure Dreni. Akuzave dhe sulmeve të Izet Haxhisë nuk i shpëtoi as Presidenti i Republikës, Ilir Meta. Ish-truproja e Berishës lëshoi dje një deklaratë shumë të fortë teksa akuzoi Metën se ka bashkëpunuar me ish-kryeministrin për ta ndëshkuar padrejtësisht.
Madje Haxhia sulmoi edhe prokuroren e çështjes, Fatjona Memçaj, të cilën e cilësoi si të blerë nga Berisha. Prokurorja kërkoi nga trupa gjykuese të mos pranohet kërkesa e Haxhisë për rigjykim. “Ka një marrëveshje politike mes Sali Berishës dhe Ilir Metës për të më ndëshkuar mua. Kjo çështje është njësoj si trekëndëshi i Bermudeve, politikë-drejtësi-media. Këtë reagimin e prokurores që kërkon të mos riçelet gjykimi nuk e kuptoj. Por mesa duket ajo ka marrë urdhër për këtë qëndrim”, tha Izet Haxhia.
Sulmet e drejtpërdrejta të Haxhisë kundër Sali Berishës dhe Ilir Metës kanë trazuar ujërat në politikën shqiptare. Ekstradimi i tij nga Turqia një vit më parë e shqetësoi Berishën sepse e akuzoi Haxhinë se kishte bërë marrëveshje me drejtësinë shqiptare. Ndërsa paralajmërimet se ka në dorë prova të reja për vrasjen e Azem Hajdarit pritet të sjellin zhvillime shumë interesante në lidhje me këtë ngjarje nëse Gjykata e Apelit vendos të pranojë kërkesën e Haxhisë për rigjykim.
Vendimi i gjykatës
Gjykata e Apelit të Tiranës do të vendosë ditën e hënë nëse dosja “Hajdari” do të rihapet dhe nëse Izet Haxhia do t’i nënshtrohet një procesi të ri gjyqësor. Përmes këtij procesi, ish-truproja e Sali Berishës kërkon të hedhë poshtë dënimin me 25 vite ndaj tij për vrasjen e Azem Hajdarit sepse është dënuar në mungesë dhe pa patur dijeni. Haxhia po ashtu pretendon se rolin kryesor në atentatin ndaj Hajdarit e ka patur Sali Berisha dhe këtë të vërtetë ai kërkon ta zbulojë përmes këtij procesi të ri gjyqësor.
Treshja gjykuese që vjen nga Apeli i Krimeve të Rënda, Dhimitër Lara, Sokol Binaj dhe Nure Dreni do të mblidhen sërish në datën 18 mars në orën 12:00 për të dhënë verdiktin përfundimtar për kërkesën e Haxhisë. Vendimi nuk u dha dot ditën e djeshme sepse gjatë seancës avokati mbrojtës i Izet Haxhisë, Bashkim Nikolla paraqiti kërkesën që të përjashtohet trupa gjykuese sepse kërkojnë gjyqtarë që kanë kaluar vetingun. Kjo kërkesë do të merret në shqyrtim brenda 48 orësh nga një trupë tjetër gjyqësore. /Mimoza Ibra