Duket se numri i kandidatëve nga radhët e opozitës që po marrin mandatin e deputetit sa vjen dhe po rritet dita ditës.
Sot, Komisioni Qendror i Zgjedhjeve i dha mandatin e deputetit edhe gjashtë kandidatëve të tjerë nga listat e PD-së dhe LSI-së.
Nga qarku i Beratit, Lefter Maliqi mori mandatin e Astrit Velisë të PD-së
Nga qarku i Lezhës Elda Hoti mori mandatin e lënë nga Viktor Tushaj të LSI-së.
Në Durrës mandatin e Nora Malaj e mori Edlira Hyseni.
Në Gjirokastër në vend të Vangjel Tavos të LSI e merr Ediola Braha.
Në Korçë Klevis Balliu do të zëvendësohet nga Ligoraq Karamelo.
Ndërsa mandatin e Gent Strazimirit në Tiranë do ta marrë Majlinda Halilaj.
Ndërkohë ditën e sotme edhe një kandidat nga radhët e PD për qarkun Kukës vendosi që të marrë mandatin e deputetit.
Alban Zeneli ka pranuar të marrë mandatin e deputetit të Partisë Demokratike në vend të Flamur Nokës, që hoqi dorë nga mandati.
Zeneli ndodhej pas Nokës në Qarkun e Kukësit, dhe pas heqjes dorë nga mandati nga ky i fundit, mandati i kalon pikërisht Zenelit.
Ish-deputeti i Kukësit ka dorëzuar sot në KQZ formularin e dekriminalizimit, dhe për rrjedhojë kërkon marrjen e mandatit për Partinë Demokratike.
Kujtojmë që Zeneli ka qenë deputet mandatin e kaluar dhe pas disa ditësh reflektimi, ka vendosur që të marrë mandatin e Nokës.
Zeneli është kandidati i disatë nga PD, që pranon të marrë mandatin e deputetit, ndërkohë që rrjedhja nga lista e PD-së, pritet të jetë e gjatë dhe nuk është çudi, që në Kuvend të plotësohet numri i deputetëve të PD-së që lanë mandatet.
E njëjta gjë mund të thuhet edhe për LSI-në, deputetët e së cilës pothuajse janë zëvendësuar të gjithë në Kuvend, pas lënies së mandateve në mënyrë vullnetare.