Tre partitë parlamentare PD, LSI, PDIU, deklaruan se nuk janë më pjesë e “parlamentit të krimit e korrupsionit” dhe publikisht me shkrim, dorëzuan dorëheqjet nga mandatet, por fakti që pubikojmë sot, tregon se Basha, Kryemadhi e Idrizi, nuk kanë hequr akoma duart, nga milionat që u jep shteti, si parti parlamentare.
Lëvizja që po bëhet nga opozita, duket si një lojë, mbasi 2 orë pasi krerët e tre partive parlamentare të opozitës, dorëzuan dorëheqjet e deputetëve në Kryesinë e Kuvendit, qeveria ka kaluar në llogaritë e PD, LSI e PDIU, fondin financiar bazë, që u takon për vitin 2019, si parti parlamentare.
Krerët e partive, paçka se kanë deklaruar largimin nga parlamenti edhe zyrtarisht, dorëzuan mandatet, tërhoqën fondet, që jepen vetëm për partitë palamentare, duke lënë të kuptohet, se në parlament nuk janë me letra, por janë me lekë.
Sipas informacionit nga Thesari i Shtetit, në llogaritë e PD, LSI e PDIU janë depozituar 900 milionë lekë në total, nga të cilat, PD ka marrë 520 milionë, 808 mijë e 875 lekë të vjetra, LSI ka marrë 270 milionë, 160 mijë e 224 lekë të vjetra, ndërsa PDIU ka marrë 100 milionë, 107 mijë e 290 lekë të vjetra.
Mirëpo nuk kanë fund, çudirat ose më saktë maskarallëqet, që partitë politike pozitë-opozitë, bëjnë me taksat e shqiptarëve, të cilat përveçse paga, trajtime e shpërblime milionëshe, zhvatin fonde vjetore partiake, ku janë futur partia “Doshi-Gjinushi” dhe partia “Blushi”, të cilat marrin nga 65-70 milionë lekë të vjetra në vit. /Pamfleti
