Ervin Salianji ka nënshkruar dorëheqjen nga funksioni i deputetit. Pak minuta më parë është shpërndarë deklarata e dorëheqjes së tij drejtuar Komisionit parlamentar të mandateve dhe imunitetit.
Të njëjtën gjë po e bëjnë gjithë deputetët e tjerë të opozitës, por rasti i tij sikurse dhe i disa të tjerëve brenda grupit parlamentar është më specifik pasi ai është nën hetim për disa raste, më i famshmi për “Skandalin Babale”.
Deputeti i PD, Ervin Salianji është zyrtarisht nën hetim për kallëzim të rremë, i thirrur edhe nga Prokruroria lidhur me denoncimin e audiopërgjimit të Albert Veliut (Babales), ndërkohë që dosja është në gjykim.
Ditën e sotme Salianji kërkoi nga gjykata, moszgjatjen e hetimeve për dosjen Babale, në mënyrë që ai të përfitoi sa të mundet nga “parzmorja” që i krijon mandati.
Por me dorëzimin e mandatit, djegia e tij si vendim politik i grupit parlamentar të PD, do t’i hap rrugën drejtësisë dhe gjykimin e rastit me të gjitha atributet që parashikon ligji./Ekskluzive.al
Vendimi i Gjykatës së Krimeve të Rënda për rastin “Babale”:
Në vendimin e gjykatës pasqyrohen dëshmitë e Fredi Alizotit, për të cilën u kërkua nga prokuroria masa “arrest me burg”, masë që u caktua edhe për Albert Veliun (Dëshmitari X).
Veliu ishte dëshmitari X, në audiopërgjimin e publikuar nga PD, ku implikohet vëllai i ministrit Xhafaj, Agron Xhafaj në pazare droge.
Në vendimin e zbardhur thuhet se Jetmir Olldashi nuk dorëzoi përgjimin origjinal, ndërkohë që motivet që i shtynë të hetuarit për ‘kallëzim të rremë’ janë të ndryshme.
Sipas vendimit të Gjykatës, motivi i Olldashit lidhet me denigrimin e figurës së ministrit Xhafaj, ndërsa Veliu kërkonte të përfitonte azil për vete dhe familjarët.
“Motivet që i shtynë të hetuarit në kryerjen e veprës penale të “kallëzimit të rremë” rezultojnë të ndryshëm. Për të hetuarin Olldashi me profesion gazetar dhe me lidhje të ngushta të një prej deputetëve të krahut opozitar, dyshohet se motivi lidhet me denigrimin e figurës së ministrit të Brendshëm.
Qëllimi i investigimit të tij, sikurse iu pohoi drejtuesit të emisioni të “Pa Ekspozuarit” ishte vëllai i ministrit të Rendit, ndërsa materiali u përgjuar nëse do ishte i vërtetë, do të duhej ta dorëzonte në organet e ndjekjes penale dhe jo në selinë e një force politike.
Për të hetuarin Veliu, motivi dyshohet se lidhet me qëllimin për të përfituar për vete dhe për familjarët azil”, thuhet në një pjesë të vendimit.
