Kryetari i Partisë Demokratike ka njoftuar përmes një deklarate për mediat këtë të dielë, djegien e mandateve parlamentare të opozitës, pasi siç tha, e ka lexuar mjaft qartë mesazhin e popullit në protestën e djeshme.
Por orë më vonë pas deklaratës, ka ardhur dhe reagimi i parë nga Qeveria. Ministrja e Shtetit për Marrëdhëniet me Parlamentin, Elisa Spiropali në një reagim në Twitter thotë se Basha ka vendosur të djegë opozitën.
“Lulzim Basha tha se do digjte qeverinë dhe paska vendosur të djegë opozitën! Sinqerisht nuk do ta dëshironim kurrsesi degradimin e tyre konstant, po në këto kushte, duhet pohuar kjo e keqe e ka një të mirë: Nuk do t’i marrin më rrogat për ta ndotur Parlamentin me baltë e bojë!”, shkruan zonja Spiropali.
LEXO EDHE: Djegia e mandateve dhe përfitimet që ka një deputet
Ndërkohë nga emisioni “Provokacija”, të premten, Spiropali tha se nëse do e ndanin pushtetin me opozitën, sipas saj nuk ka ndonjë gjë të keqe.
“Në fakt për ta bërë pak më përfshirëse për të mos u dukur që ne kemi barrikada apo ndonjë problem të madh me opozitën që në fakt nuk e kemi, ne do donim shumë që të kishim një opozitë konstruktive. Madje do donim shumë që edhe në zgjedhje… edhe të ndanim pushtetin me nuk ka asnjë gjë të keqe në kuptim elektoral. Disa bashki mund t’i qeverisin ata disa bashki mund t’i qeverisim ne. Por kështu si po shkon ne e shikojmë shumë të vështirë që opozita ta marrë veten”, deklaroi Spiropali.