Kryeministri Edi Rama ka komentuar në intervistën e tij për emisionin “Real Story”, edhe përfoljen e kryebashkiakut Vangjush Dako, në disa përgjime në atë që njihet si “Dosja 339”.
Rama është pyetur nga gazetari Sokol Balla, nëse do e kandidojë sërish për Bashkinë e Durrësit, Vangjush Dakon, pas këtyre përgjimeve.
“E para si mundet “Zëri i Amerikës” që të bëhet zëdhënës i medias në Shqipëri.
Nuk kam asnjë kompleks që më sulmon “Zëri i Amerikës”.
Të dyja herët i ka bërë këto lajme nga gazetarë shqiptarë. Le të jetë dhe CNN.
Herën e parë bënë një goditje skandaloze për punësimet në burgje.
Ministrja e Drejtësisë iu vuri në dispozicion mijëra faqe të dokumentuara.
Nuk janë fakte janë muhabete telefonas. Me muhabete mund të ngatërrohej gjithë Shqipëria.
Nuk mund të ngresh akuza për dikë bazuar në raporte telefonatash.
Sokol këtë të lutem mos ma thuaj se nuk kam asnjë lloj tendence të them dicka që është njëri dhe tjetri.
Nëse bëhet fjalë për këto muhabete , Dako mund të kandidojë edhe 500 herë të tjera”, tha Rama.
“E konsideroj vërtet të trishtueshme dhe të neveritshme të tërhiqeni prej hunde nga Dosja 339, në disa komunikime të këtij dhe atij dhe që vajti deri te Zëri i Amerikës, që më bëri të reagoj, pasi dhe Zëri i Amerikës u bë jehonë e kazanit.
Përgjimet nuk janë provë në gjykatë.
Përgjimet nuk mund të merren dot për bazë për të sulmuar njerëz.
Nëse do të ishte për përgjimet, Saimir Tahiri do kishte shkuar në burg që 48 orë pas daljes së disa bisedave mes kriminelëve, por ishte sërish prokuroria italiane, një nga më të ashprat, që tha se ky nuk ka lidhje.
Nëse bëhet fjalë për këto muhabete, Vangjush Dakos i takon të kandidojë edhe 500 herë të tjera, por kur të vijë puna që të gjykojmë për kandidatët, do të vendosim edhe për Vangjush Dakon”, tha më tej ai.