Këshilltari i Presidentit Thaçi, Ardian Arifaj, ka konfirmuar se komandanti i Gardës Kombëtare të Iowas, gjenerali majori Timothy Orr e ka anuluar vizitën në Kosovë.
Arifaj ka thënë se njoftimin për anulimin e vizitës së gjeneralit Orr e kanë marrë nga Komandanti i FSK’së, Rrahman Rama, i cili ka pasur takim me zyrtarët e SHBA’së në Ambasadën në Prishtinë.
“Gjeneral Rama vetëm na ka njoftuar për anulimin e vizitës së gjeneral majorit Timothy Orr”, ka thënë Arifaj, për Gazetën Express.
Ai ka thënë se Shefi i FSK’së i ka sqaruar në letrën njoftuese se anulimi i vizitës së zyrtarit amerikan ka ardhur për shkak të mosvazhdimit të dialogut mes Kosovës dhe Serbisë.
Zyrtarët të FSK’së dhe as të Ministrisë së Mbrojtjes nuk kanë dashur të flasin për këtë temë.
Zyrtarët të Ministrisë së Mbrojtjes kanë thënë se Rrahman Rama e ka njoftuar edhe Ministrin Rrustem Berisha dhe Kryeministrin Ramush Haradinaj për anulimin e vizitës.
Zyrtarët amerikanë kanë ndëshkuar Ramush Haradinajt me mosdhënie të vizës amerikane për shkak të mos heqjes së taksës ndaj produkteve serbe e boshnjake.
Ramush Haradinaj kishte vendosur taksën ndaj produkteve të Serbisë kur Lista Srpska ishta larguar nga Qeveria e Parlamenti për shkak të transformimit të FSK’së në ushtri.
Kryeministri ka thënë se heqja e taksë do të ndodhë kur Serbia do ta njohë Kosovën.
Kryetari i Kuvendit, Kadri Veseli, ka kërkuar pezullimin e taksës për t’i dhënë hapësirë dialogut me Serbinë. Po ashtu, Presidenti ka kërkuar të hiqet taksa dhe të vazhdohet dialogu me Serbinë.
Marrëveshja finale ndërmjet Kosovës dhe Serbisë pritet të nënshkruhet deri në qershor në Shtëpinë e Bardhë.
Presidenti i Kosovës, Hashim Thaçi ka përmendur mundësinë e ndyrshimit dhe korrigjimit të kufijve si pjesë e marrëveshjes finale me Serbinë.