Trajneri i Kombëtares, Kristian Panuçi, në një lidhje direkte për “Zona Gol” në Supersport, për Kombëtaren, gjendjen e grupit, Serinë A, por edhe çështje të tjera.
RRITJA E SERIA A – “Kampionati italian është rritur shumë vitet e fundit, megjithatë kemi rrugë për të bërë. Napoli ka dalë nga Champions, Milani ka dalë nga Europa League. Megjithëse, jemi në rrugën për të qenë një nga kampionatet më të fuqishme. Roma? Është një skuadër e madhe, vitet e fundit është futur në bursë. Ka humbur disa lojtarë të rëndësishëm, si Toti. Është diçka e bukur, që po ndërtohet, dhe këtë vit po jep sinjale që do jetë një skuadër e madhe.”
SHQIPËRIA, PËR SA BËHET? – “2018-a ishte e tmerrshme dhe e shëmtuar. Shqipëria po rikuperon disa lojtarë të rëndësishëm, dhe shpresojmë e uroj që kjo 2019-ë të na japë disa rezultate të mira.”
PERIUDHA E PAUZËS – “Kjo periudhë më ka shërbyer për të reflektuar. Siç e mbyllëm në ndeshjen e fundit me Uellsin, pranova që duhet të reflektoj e të ndryshoj. Besoj se do rregullojmë gjithçka, që ky vit të jetë i mbari.”
RIKUPERIMET – “Po rikuperojmë Sadikun, të shohim si do jetë Roshi. Abrashi po rikthehet. Cikalleshi ka shënuar, por duhet të vazhdojë, sepse për 4-5 muaj nuk ka shënuar. Është një gjendje që të gjithë futbollistët, më shumë se sa t’i grumbulloj unë, ata duhet të vijnë vetë, me formën dhe me golat e tyre.”
KEQARDHJE PËR HEQJEN DORË NGA FUTBOLLI SULMUES? –“Në këtë 1 vit e gjysmë, e kishim thënë që do bënim eksperimente. Nuk patëm përgjigjet e duhura, por tani bazën do e nisim nga diçka më e sigurt mbrapa. Do kemi një skuadër në mbrojtje, sepse mund të na sjellë tek suksesi.”
44 LOJTARË TË GRUMBULLAR – “Lista do jetë më e shkurtër, rreth 18-20 futbollistë. Durmishaj po shënon në Greqi, por grupi do jetë ai që ka qenë. Mund të ketë edhe ndonjë prurje të re. Rrugës, prej dëmtimeve apo pezullimeve, do të ketë edhe futbollistë të tjerë që do afrohen. Por, grupi është.”
GATI PËR MARSIN? – “Kam vënë re që kur i kërkoja skuadrës të luante futboll hapur, bëheshim shumë të kërcënueshëm. Tani duhet të jemi më të mbyllur, më kompakt. Të katër ekipet e para kanë qenë në Europianin e 2016-ës, dhe për këtë arsye do të jetë një grup shum i vështirë.”
SHUMË NERVOZ KUR HUMBISNI – “Është e drejtë, edhe unë kam pasur problemet e mia, por në shumicat e takimeve kam pasur 5-6 futbollistë që më mungonin. Të gjithë keni menduar se i kam pasur si justifikime, por jo. Nuk e pranoj dot humbjen, por e pranoj që duhet të jem më i qeshur dhe sportiv, që ta reflektoj edhe të tjerët. Nëse humbas sërish, do marrim Hafizin në konferenca pas ndeshjes (qesh).”
DO KENI RAPORT MIQËSORE ME LOJTARËT – “Kur bëhet fjalë për ta, raporti është ndryshe. Duhet një seriozitet dhe profesionalizëm. Ka dy mënyra, të punosh mirë ose keq. Nëse punon mirë, ka rregulla, dhe duhen zbatuar. Jemi në Kombëtare. Në ato 1 orë e gjysmë, dua rregull maksimal. Jashtë, mund t’i pyesni vetë sa i ashpër jam.
RASTI GUIADARA – “Tomas Guidara është arbëresh, kam folur me të. Është një mbrojtës i djathtë, për momentin po merret familja e tij dhe federata tjetër, për të arritur akordin. Kanë filluar procedurat, dhe ai mund ta marrë pasaportën shqiptare, dhe është i gatshëm të vijë. Kam pasur edhe futbollistë të tjerë që kanë thënë kështu, e pastaj kanë ndërruar mendje, por do flas më shumë kur të ketë pasaportën shqiptare.”
PREZENCA SOT NË ‘SELMAN STËRMASI’ – “Isha sepse luante Partizani. Siç e dini, kam Bulkun, që e ndjek të gjithë kampionatin. E kam treguar se kam grumbulluar edhe futbollistë nga këtu. Nëse do kemi nevojë, do jemi gati t’i marrim. Jam edhe nëpër Europë, duke parë futbollistë të tjerë. I kemi të ndara punët. Ka disa lojtarë te sulmi i Partizanit që kanë kualitet, shpejtësi. Edhe Kastrioti bëri një ndeshje të mirë. Kam marrë edhe Abazajn, Gavazajn, Lilajn, Gurin edhe ata kanë luajtur në Shqipëri, por tani nuk po luajnë shumë. Vetëm Lilaj që po luan. Asani? Është i shpejtë dhe bën shumë punë, ndoshta.”
PËRGATITJET KËTO DITË – “Nuk kam takuar miq, por kam qenë në Federatë, sepse kemi bërë programin për 2 ndeshjet e marsit, por edhe për majin. Shumë futbollistë e mbyllin kampionatin në fillim të majit, dhe do shohim gjendejn e tyre. Programi bëhet edhe për verën. Nuk dua të përsëris më ndeshjet me Kosovën dhe Ukrainën, një sezon më parë.”
ZGJEDHJA E DUKËS – “Ka bërë diçka të jashtëzakonshme, jo vetëm unë por të gjithë shqiptarët duhet të jenë krenarë. Po bën zyrat e reja, po kthen këtë federatë, dhe po bën një punë të mirë. Ishte një ditë shumë e mirë për Shqipërinë.”