Në ekspozitën e cila u mbajt në Berlin, kryeministri Edi Rama solli disa risi. Ato që bënë më shumë përshtypje janë edhe pikturat që solli mbi dokumente dhe letra të rëndësishme politike.
Një ndër to është edhe një letër drejtuar Presidentit Ilir Meta ku kryeministri reagon ndaj refuzimit që Meta i bëri emërimit të Sandër Lleshajt si ministër i Brendshëm.
Mirëpo në një intervistë për Deutsche Welle, Rama thotë se politika nuk ka asnjë lidhje dhe se ai thjesht vizaton gjatë momenteve të punës.
DW: Ju pikturoni me bojëra uji mbi dokumente politike, a ka ndonjë lidhje midis përmbajtjes së letrave dhe asaj që pikturoni?
Rama: Politika këtu nuk ka asnjë lidhje. Unë thjesht gjatë kohës së punës vizatoj, vizatoj gjatë takimeve, vizatoj gjatë telefonatave, gjatë momenteve të pauzave dhe është një proces krejt i natyrshëm, ku dora ndjek njërin sy dhe njëri sy ndjek dorën, ndërkohë që vëmendja është e gjitha e përqendruar tek diskutimet, tek puna, tek vendimet për t’u marrë, tek çështjet për t’u adresuar.
DW: Pra, nuk keni parë ndonjë bashkëvarësi, ndonjë ndryshim, ta zëmë, mes pikturës mbi një letre që e keni bërë për kancelaren Angela Merkel dhe një letre për presidentin Ilir Meta?
Rama: Jo nuk e kam parë këtë gjë.
DW: Në një intervistë për shtypin gjerman ju kishit thënë se hytë në politikë, në fillim të viteve 1990, për shkak të një detyrimi qytetar, se të qenit artist nuk ju çlironte nga kjo përgjegjësi. Tani jeni politikan dhe vazhdoni të merreni me art. Është një vendim ky i vetëdijshëm, i marrë me intuitë, apo një strategji “exit”.
Rama: Unë e kam organike, e kam njësoj si ajrin që thith. Faktikisht nuk më pengon, përkundrazi, më ndihmon. Sepse ndërkohë puna ime vazhdon normalisht, edhe kjo pjesa tjetër vazhdon normalisht.