Pritet që mësimi të rifillojë së shpejti në Fakultetin e Drejtësisë në Tiranë. Vendimi u mor pas një takimi mes studentëve të Fakultetit të Drejtësisë dhe dekanit Artan Hoxha.
“Ne do fillojmë mësimin në një ambient tjetër, alternativ, kudo qoftë. Ky është një vendim që ia kemi propozuar edhe më herët dekanit, dhe ai na tha që në qoftë se nuk merret asnjë masë për situatën e krijuar, do kemi një komunikim edhe me Ministrinë e Arsimit dhe do shohim se çfarë ambientesh janë të disponueshme për të zhvilluar mësim. Kjo zgjidhje është e fundit, por jo më e mira”, tha një studente e Fakultetit të Drejtësisë.
Studentët e Fakultetit të Drejtësisë thanë se këtë vendim e morën bashkë me dekanatin pasi nuk gjetën zgjidhje edhe pasi i kërkuan ndihmë rektorit të universitetit të Tiranës, Mynyr Koni.
“Ne kemi shkuar te rektori i Universitetit të Tiranës, Mynyr Koni. Ai nuk ishte në zyrë, ne e kemi pritur atë, por gjithsesi kërkesa jonë u dorëzua në rektorat dhe u protokollua.
Sot rektori kishte kthyer një përgjigje, një përgjigje të zbehtë. Më vjen shumë keq ta them, por kjo sjellje e rektorit Mynyr Koni është arrogante.
Ne nuk kemi pritur, kemi shkuar në disa institucione e jemi pritur në çdo zyrë, ndërkohë që rektori ka shprehur një mungesë interesi për këtë problematikë”, tha një student i Fakultetit të Drejtësisë pas takimit që patën me dekanin e Fakultetit të Drejtësisë, Artan Hoxha, ku diskutuan për të gjetur një mundësi që mësimi të rifillojë.