“Jam shumë krenare dhe largohem me zemrën plot”. Kështu deklaroi Romana Vlahutin në një intervistë në përfundim të mandatit të saj si ambasadore e BE-së në Tiranë.
Ish diplomatja e Bashkimit Europian, Romana Vlahutin u kthye në “armiken” e politikanëve, kryesisht të opozitës e Sali Berishës gjatë qëndrimit të saj në Shqipëri, me të cilin as u takua në përfundim të misionit.
“Mendoj që hapëm dosjen më kritike, hapëm gjyqësorin dhe, ndershmërisht, ishte absolutisht e parashikueshme që grupet e interesit do t’i viheshin pas kësaj reforme, kështu që nuk është asgjë personale. Është një zhurmë logjike do të thoja, që u bë nga njerëz, të cilët nuk janë të lumtur nga reforma dhe donin t’i mbanin gjërat siç ishin. Për mua, personalisht, ishte në kuptimin e plotë vetëm zhurmë dhe ajo çfarë mendoj që është më e rëndësishme, apo e vetmja gjë e rëndësishme, janë rezultatet”, sqaroi ajo.
E larguar prej korrikut 2018, për t’u zëvendësuar nga italiani Luigi Soreca, kroatja ka bërë një vizitë dhe takime informale në vendin ku shërbeu për gati katër vite në krye të zyrës së BE-së. Romana Vllahutin është fotografuar në një qendër tregtare në Tiranë.
Mësohet se Vlahutin gjatë vizitës në Tiranë ka kryer disa takime në zyrtarë dhe ish-ministra të qeverisë ‘Rama’, me të cilët bashkëpunoi gjatë mandatit të saj në Tiranë.
Dhe ky nuk është rikthim rastësor, ajo ka premtuar se edhe pse jo në detyrë, Shqipëria do të mbetet në radarin e punës së saj.
