Pas denoncimit të TvT ditën e djeshme në lidhje me problematikat e gjurmimit dhe bllokimit të faqeve që ofrojnë lojra fati të paligjshme, në veçanti baste sportive, ku u investigua rasti i bllokimit të gabuar të shoqërisë WebHost sh.p.k., vjen sot reagimi i AMLF dhe AKEP. Nëpërmjet një emaili AKEP ka kërkuar ISP-ve vendase (ku përfshihen dhe operatorët mobile) që të heqin menjëherë bllokimin e shoqërisë WebHost sh.p.k.. AKEP konfirmon që AMLF e ka njoftuar sot paradite për vendosjen e gabuar të WebHost sh.p.k. në listën e faqeve për bllokim dhe si i tillë bllokimi duhet hequr.
Bllokimi apo çensurimi i faqeve internet është një sfidë e shumë qeverive nëpër botë. Në veçanti bllokimi i pjesshëm i kontentit paraqet sfida të mëdha teknike me kosto të lartë për ISP-të. Por gjithashtu bllokimi i faqeve është dhe një temë e nxehtë për shkak se shpesh, pushtetet të tipit autokrat, e përdorin si mekanizëm për të ndaluar opozitën që gjithmonë e më shumë tashmë realizohet në internet, në formën e faqeve, portaleve apo mediave sociale. Raste të debatueshëm ka pasur plot, ndër më të bujshmit mund të përmendim atë të Turqisë kur kryeministri (i atëhershëm) Erdogan tentoi një bllokim të Facebook e Twitter. Kjo solli debate të brendshme në Turqi ku një ndër figurat që u shfaq kundra kësaj mase ishte presidenti Gul, i cili shfaqi opinionin e tij në Twitter duke treguar që kishte anashkaluar dhe bllokimin.
Por rasti aktual i Shqipërisë është i ndryshëm, dhe po të krahasohet me atë të mbylljes së portaleve në tetor 2018. Mbyllja e faqeve që ofrojnë lojra fati të paligjshme ka qenë gjithmonë në fuqi, pavarësisht se entet përkatëse nuk e ndiqnin asnjëherë si problematikë dhe e vetmja faqe e licencuar në Shqipëri për lojra fati on-line ka qenë Bastarena. Kur Rama erdhi në pushtet ai ndërrmori një nismë të tillë në tetor-nëntor 2013 por që u harrua shpejt. Atëherë “armiku” ishin faqet kineze apo bet365 (çuditërisht nuk u fol asnjëherë për faqet vendase gjithashtu të paligjshme), sot janë faqet kryesisht vendase. Rama ka deklaruar shpesh që humbja e ekonomisë nga bastet e paligjshme kap shifra të frikshme, deri në 720 milione Euro në vit. Me ndryshimet e ligjit “Për lojërat e fatit” të fundvitit 2018 që solli mbylljen e plotë të salloneve të basteve sportive, i tërë fokusi është tashmë në online ku mendohet që do të spostohet i tërë aktiviteti i basteve sportive, por jo vetëm, duke qenë se dhe lojrat e tipit kazino janë tashmë të mbyllura.
AMLF ndodhet përballë përgjegjësisë tashmë për të vepruar. Koha do të tregojë sa do të mjaftojë vetëm angazhimi i kryeministrit Rama dhe sa efikase do të jetë kjo betejë e tija me paligjshmërinë.