Kryetari i Këshillit të Lartë të Prokurorisë, Gent Ibrahimi ndihet krenar që ka punuar për Soros. Në një intervistë për Ora News, ai e pranon një fakt të tillë, por mohon të ketë lidhje me Partinë Socialiste.
Beti Njuma: Ju kanë cilësuar si një jurist që keni punuar për Sorosin edhe pse nuk është herezi, por edhe për lidhje të ngushta me PS?
Gent Ibrahimi: Ajo e para është shumë e vërtetë dhe jam shumë krenar. E dyta nuk është aspak e vërtetë. Është thjeshtë një ide që qarkullon me këmbëngulje, por që nuk është e vërtetë.
Ibrahimi përgjigjet edhe për Arta Markun
Beti Njuma: Duke qenë edhe në qendër të vëmendjes, si institucion i ri ka patur akuza se duke marrë në kontroll shumicën e KLP, Arta Marku ka realizuar dy goditje, një në favor të saj dhe një përllogari të PS…
Gent Ibrahimi: Nuk e di. Unë i njoh anëtarët e KLP prej pak kohësh. Të gjithë anëtarët janë njohje të reja. Ecuria e deritanishme ka qenë optimale, me këta njerëz jemi marrë vesh për gjithçka. Ka një debat konstruktiv, ka ide që janë profesionale dhe njerëzore, të cilat kanë kulmuar në këto vendime.
Unë nuk e di nëse ndonjëri prej tyre ka simpati apo antipati për kandidat të mundshëm. Jemi njerëz dhe mund të kemi edhe qasje të tilla tek rastet konkrete, por përsa kohë që proceset për identifikimin e kandidatëve dhe për përzgjidhjen e tyre finale bëhen kritere objektive, simpatitë dhe antipatitë kanë aq vlerë sa mund të ketë fjala.
Në lidhje me prokurorët e SPAK-ut, ai tha se do të jenë më të mirë.
Ibrahimi tha se ligji i krijon garanci këtyre prokurorëve.
Gent Ibrahimi: Ligji i krijon garanci që këta njerëz ti futen detyrës së re me një mentalitet të ri, me garanci të reja, me një status të ri sa i takon pagës, sigurisë për karrierën. Ne do bëjmë pjesën tonë të detyrës që aty të shkojnë më të mirët. Këta njerëz kanë qenë prokurorë, do vazhdojnë të jenë prokurorë, asgjë nuk do ndryshojë në mënyrë dramatike në jetën e tyre, por ata do veprojnë në një kontekst të ri. Në kontekstin e garancive të reja, në kontekstin e një mandati të ri, pastërtisë së figurës dhe në kontekstin e një pritshmërie të re, edhe në kontekstin e vëmendjes së shoqërisë dhe medias, për të diktuar një nivel të ri performancë për prokurorët e SPAK.
Gent Ibrahimi tha se Shkollë e Magjistraturës është porta e vetme për të hyrë në sistemin e drejtësisë në Shqipëri. Ai sqaroi se ata persona që duan të jenë pjesë e drejtësisë shqiptare, pavarësisht se mund të kenë mbaruar jashtë shkollën, duhet t’i nënshtrohen 3 vjet Shkollës së Magjistraturës.
Beti Njuma: Është parë mbushja e kësaj zbrastie me kuadro që vijnë nga jashtë, që kanë përfunduar shkollën jashtë?
Gent Ibrahimi: Për këtë ka një JO të madhe. Shkolla e Magjistraturës është porta ekskluzive për tek sistemi shqiptar i drejtësisë. Çdo kush mund të ketë mbaruar në Oxfort, Harvard, por duhet të kalojë edhe Shkollën e Magjistraturës. Në këtë kuptim kemi një problem sa i takon ritmit të plotësimit të vakancave që krijohen. Pa dyshim Shkolla e Magjistraturës do të përshpejtojë rimet, do të nxjerrë më shumë kuadër të rinj, por një kandidat për prokuror, për gjyqtar do 3 vite që të bëhet i tillë. Kështu që është një problem afatgjatë që do të duhet të ballafaqohemi në vijm.
Presim kandidatë që kanë kaluar vetingun, por dhe ata që pritet të kalojnë vetingun
Jo sa i takon KLP, pjesa jonë e verifikimeve kryhet shumë shpejt. Pjesa e verifikimeve që ka të bëjë me vetingun do të varet nga vetingu. Ne do të përpiqemi që ti fusim kandidatët në listën prioritare të institucioneve të vetingut. Ne presim që të kemi kandidatë qoftë nga ata që e kanë kaluar filtrin në veting, qoftë nga ata që nuk e kanë kaluar dhe do të duhet ta kalojnë atë.
Veprat penale që do të trajtojë SPAK
Pjesa dërrmuese e portofolit të veprave penale që hetohen nga Prokuroria e Krimeve të Rënda do t’i kalojë SPAK, janë edhe disa vepra të tjera penale që hetohen nga Prokuroritë e Rretheve, kryesisht ato që kanë të bëjnë me korrupsionin. Pra mund të paramendosh që SPAK do ketë nevojë për një ekip prej 20 prokurorësh.
Mandati i prokurorit të SPAK 9 vjet, garanci për karrierën
Është një privacion i rëndësishëm, në fund të fundit jemi qenie njerëzore që kemi të drejtë kushtetuese për privatësinë. Këto janë disa rrethana speciale që i imponojnë këtë kufizim të përkohshëm të privatësisë, në funksion të diçkaje më të rëndësishme. Për ata kjo gjë e rëndësishme e ka emrin karrierë, e ka emrin konfirmim profesional, për ne të tjerët, shoqërinë e ka emrin garanci që në ato nivele puna e hetimit të krimit të bëhet siç duhet dhe me këmbënguljen e duhur.
Është një garanci e rëndësishme. Garancia më e rëndësishme për një funksionar publike është mundësia për të qëndruar gjatë në detyrë, një mundësi që nuk vihet në pikëpyetje nga rrethanat politike. Pra garancia e parë është të dish që ti i hyn një karriere, që zgjat aq sa zgjat. 9 vjet është një kohë e gjatë, për disa nga prokurorët mund të jetë një kohë që mund të korrespondojë me një pjesë të mirë të karrierës. Dikush mund ti afrohet fundit të karrierës me këto 9 vjet, dikush mund ta konsolidojë karrierën, por është një kohë e rëndësishme për pavarësinë.
Është vështirë që ky mandat 9-vjeçar të ndërpritet, ndonëse mundësia teorike ekziston, ata do të vazhdojnë të jenë prokurorë. Si të gjithë të tjerët mund të bien pre e shkeljeve disiplinore që ndëshkohen nga KLP, por jo si çdo rast tjetër, në këtë rast KLP duhet të veprojë me dy të tretat që është një shumicë shumë e lartë dhe vështirë për tu arritur. Ka garanci për këta njerëz që do të marrin kurajën qytetare që do të shërbejnë si Prokurorë të SPAK, janë të mëdha, qoftë sa i takon mandatit, qoftë kushteve ekstra të vështirësive ekstra që imponohen mbi KLP për ta ndërpre në ndonjë rast eventual mandatin e tyre.