Kryeprokurorja e Përgjithshme e Përkohshme, Arta Marku, po numëron ditët e fundin në karrigen e organit të Akuzës. Ngritja e Këshillit të Lartë të Prokurorisë, zgjedhja e kryetarit dhe zëvendëskryetarit të këtij institucioni i ka hapur rrugë zgjedhjes së Kryeprokurorit të Përgjithshëm, si dhe ngritjes së strukturave të reja të Akuzës.
Ndonëse nga KLP nuk është hapur ende gara për kryeprokruor, kanë nisur të qarkullojnë edhe emrat e prokurorëve që shihen si më favoritët për të zëvendësuar Arta Markun. Kushti kryesor për të marrë postin e kryeprokurorit për 7 vjet është Vettingu.
Kandidatët që do të garojnë për këtë post duhet të kenë kaluar me sukses të gjitha ‘filtrat’ e Vettingut, të jenë diplomuar në Shkollën e Magjistraturës ose të kenë doktoraturë, si edhe të kenë 15 vite punë në sistemin e drejtësisë. Këto kritere i plotëson edhe drejtuesja aktuale e organit të akuzës, Arta Marku.
Një kandidaturë tjetër e fortë është edhe ajo e prokurorit të Prokurorisë së Përgjithshme, Adnan Xholi, i cili edhe pse nuk ka mbaruar magjistraturën, ka gradë shkencore në fushën juridike. Adnan Xholi është një kandidaturë shumë e fortë përballë Markut, jo vetëm për faktin se njihet si prokurori i amerikanëve, por edhe për faktin se ishte i pari prokuror shqiptar që ‘gjunjëzoi’ ish-kryeministrin Sali Berisha, duke e çuar për herë të parë në dyert e organit të Akuzës.
Në listën e prokurorëve që plotësojnë kriteret bëjnë pjesë edhe Besnik Muçi, Sokol Stojani dhe Arben Dollapaj. Por askush nuk mund të shprehë interesin e tij për këtë post pa u hapur më parë gara nga Këshilli i Lartë i Prokurorisë.