Gjatë vitit të ardhshëm, në vend parashikohet të aplikohet një ligj i ri që synon t’i japë zgjidhje problematikave të pronësisë duke përcaktuar procedura të reja që synojnë mbylljen njëherësh të procesit të legalizimeve, kompensimin e pronarëve apo kalimin e pronësisë për tokën bujqësore. Ligji i ri është parashikuar të votohet në seancën e fundit të këtij viti me 21 dhjetor.
Në relacionin e nismës së depozituar në Kuvend, që sjell portali ekonomik SCAN, parashikohet shfuqizimi i ligjit për tokën i vitit 1991 apo siç njihet ndryshe edhe “ligji 7501”. Krahas këtij ligji parashikohet edhe shfuqizimi i ligjeve të tjera si ai për legalizmet apo për pronësinë mbi truallin shtetërore.
Përcaktimi i procedurave të reja ligjore shoqërohet edhe me nismën për të shkrirë institucionet e pronësisë në vend në një institucion të vetëm të emërtuar Agjencia Shtertërore e Kadastrës. Por nuk janë vetëm institucionet e pronësisë që shkrihen por edhe ligjet ekzistuese.
