Monika Kryemadhi, ka dalë hapur kundër ish-kryeministrit Sali Berisha, duke thënë prerë dhe publikisht se nuk pranon të djegë mandatin. Ideja e djegies së mandatave është hedhur nga Berisha dhe ka gjetur mbështetjen e shumë deputetëve të opozitës, por jo të Kryemadhit.
Kjo e fundit ka thënë mbrëmjen e sotme në studion e Report Tv se mandatin e ka fituar me gjak dhe nuk do ta djegë, ndërsa ka kërcënuar kryeministrin Edi Rama se do ta djegë me kuç e me maç.
“Unë mandatin e kam fituar me gjak, Rama s’ma heq dot se e djeg unë me kuç e maç”. Kështu shprehet kryetarja e LSI, Monika Kryemadhi e ftuar te “5 pyetjet nga Babaramo”, duke komentuar bojkotin e stërzgjatur të opozitës dhe tezën e djegies së mandatit. Ajo paralajmëroi kryeministrin se ai nuk mund t’ia heqë mandatin. “Unë mandatin e kam marrë me gjak. Nuk e lë Edi Ramën që të bëjë ç’të dojë.
Nuk është problemi tek mandati im. Por hyj prapë unë, i fus një të votuar dhe dal prapë. Po ashtu nuk quhet bojkot. Ne jemi me shqiptarët. Mandati është i imi dhe jo i Edi Ramës, nuk ma heq dot mandatin ai mua. E djeg unë atë me kuç e me maç, me gjithë kriminelët. Me gjithë orgjitë politike që ai bën. Tani nuk e toleron më njeri LSI dhe PD, shumë shpejt as në PS. Ka futur edhe kushërinj të deputetëve të PS të futur në burg”, ka thënë kryetarja e LSI.
Kryemadhi mohon që opozita të jetë në bojkot të Kuvendit, ndërsa shton se deputetët janë në kontakt me banorët dhe se politika nuk bëhet vetëm nga foltorja e Kuvendit. “Kush tha që jemi në bojkot ne. E ka bojkotuar Rama, se unë jam atje me banorët. Të rrofshin fjalimet në parlament. Ai e ka bojkotuar parlamentin”, është shprehur Kryemadhi.