Namik Dokle, ish-deputet i PS, tashmë i tërhequr për t’iu dhënë librave dhe kujtimeve, ka hedhur në rrjetin social një foto të stilolapsit të Dritëro Agollit, që këtij të fundit, i ishte dhuruar prej shkrimtarit kur Agolli ishte deputet i kuvendit të Shqipërisë.
Dritëro Agolli ka mbajtur detyrën e parlamentarit nga viti 1992, kohë kur në Shqipëri filluan proceset demokratike, deri në vitin 2001.
Postimi i plotë i Namik Dokles:
Rrinim afër në parlament. Një ditë e pashë duke shkruar në faqen e prapme të një projektligji. Pas pak ma zgjati fletën dhe unë lexova:
Këtu ku mblidhet parlamenti,
kam vetëm një karrige…
E di se ç’mendon deputeti,
kjo kafshë politike…
Pastaj ma dha stilografin.
“Po ta dhuroj”, më tha dhe më tregoi se me te kishte shkruar katër libra: “Pelegrini i vonuar”, “Lypsi i kohës”, “Njerëz të krisur” dhe “ Kalorësi lakuriq”.
I PAHARRUARI DRITERO!