Sali Berisha gëzon një reputacion të madh në publik, duke ngjallur kureshtje sa herë ai shfaqet në ekran për cilëndo çështje që trajton.
Politikani me profesion parësor kardiolog, ka treguar përgjatë këtyre viteve se kujdesi për trupin ka më shumë rëndësi se çdo gjë, e jo më kot në muajin gusht teksa ai pushonte në vilën e tij në Dhërmi gjatë kohës kur ishte kryeministër, lajmi për rekordin e notit ishte një nga ngjarjet kryesore të televizioneve shqiptare.
Kësisoj, noti është një nga sportet që e mban atë në formë, por nuk është i vetmi.
Berisha është nga të paktët politikanë që vaktet në restorante nuk i frekuenton thuajse fare, me përjashtim të drekave apo darkave zyrtare ku i duhet të respektojë protokollin.
Ai preferon që të hajë nga gatimet e shtëpisë të zonjës së tij, Liri Berisha. Ndoshta edhe sepse armiqtë e tij janë shumë në numër dhe për të shmangur rastin e ndonjë komploti të mundshëm.
Gjithmonë është treguar i hapur për t’i treguar publikut familjen e tij, ku nuk ka kursyer edhe foto me të gjithë pjesëtarët e saj. Politikani pëlqen shumë peshkun e në përgjithësi ha pak, pasi mban regjim ushqimor. Gjithashtu, ai bën shumë ecje në fundjavë.
Në mëngjes Berisha pëlqen lëngun e qitros dhe bananen. Gjatë ditës në zyrë, sidomos tani në dimër, konsumon shumë çajin, madje edhe kafen e ka zëvendësuar me të.
Doktori është njohës shumë i mirë i verërave dhe preferencë të tij ka verën e kuqe të tipit “Merlot”. Si një njeri me shqisë të mprehur, nëse dallon një konjak të mirë, por nga ata origjinalët ama, do ta shijonte më së miri atë nën shoqërinë e miqve.
Sali Berisha vazhdon karrierën e tij politike si deputet në Kuvendin e Shqipërisë.
