Fundjava është mbyllur me disa proçese zgjedhore të brendshme në Partinë Demokratike. Në Kamëz, Dibër, Korçë, Fier, Lushnje, Gjirokastër, Durrës, Gramsh, disa degë në Tiranë etj., kemi kryetarë që u rimandatuan në detyrat e tyre.
Rimandatime në fakt të një tufe me humbësa, të cilët janë sprovur në dështimin e aksionit të tyre politik dhe faktin se askush nuk i beson dhe nuk i voton në zonat, ku ata drejtojnë.
Gara krejtësisht formale, ku shumica dolën me 99.99% dhe dy prej tyre, deri tani të paktën, pa rivalë.
Pra në Kamëz nuk ka njeri tjetër veç të “përjetshmit” Xhelal Mziu, i cili nuk e toleroi postin e kryetarit nga frika se Basha e heq nga gara për kryetar bashkie në zgjedhjet e ardhshme. Por ky është i vetmi që ka fituar, sepse të gjithë të tjerët janë humbsa me rezultate katastrofike, edhe 30% më pak se në 2013.
Myslym Murizi është një fenomen i këtyre zgjedhjeve. Lulzim Basha ia bllokoi proçesin e votimit, por ai u vetshpall dje kryetar me votë plebishtare.
Në Korçë rivali i Andrea Manos mori jo më shumë se 15 vota, në Sarandë rivali i përzgjedhur i Hariz Memes 13, në Fier, Luan Baçi ia kaloi idhullit të tij Koço Kokëdhimës, në Durrës, Ferdinand Xhaferraj ishte pjesë e rekordeve zgjedhorëe në PD, që në fakt tashmë mund të quhet Republika e Re e Lulzim Bashës.
Po pse në PD nuk ka më gara?
Më një fjali çdo demokrat të përgjigjet: Kur Basha u rizgjodh i vetëngrirë pa garë, me rezultat të manipuluar, bëri pazar me këta dhe tani nuk ka se ku të shkojë.
Kjo duket të jetë e vërtetë dhe askush nuk e vë në diskutim.
Por, fatkeqsisht sot në PD ka vdekur gara, nuk ka më garë dhe ky është një problem thelbësor për ekzistencën e një partie politike.
Në PD, në bazë ka pasur gjithmonë garë, për më tepër kanë fituar edhe ata që nuk i preferonte Berisha, kështu ka qenë në Korçë, në Fier, në Vlorë, në Shkodër e gjetke. Në Elbasan, Lushnje, Gjirokastër e Durrës kishte përplasje në struktura. Zgjedhjet në bazë kanë qenë “beteja” të vërteta, në Tiranë përplasej Bamir Topi, YIli Minarolli, Besnik Mustafaj, Sokol Olldashi etj etj.
Baza e PD gjithmonë ka pasur garë, por edhe problematika, ndërhyrje, lobime etj. Por, garë ka pasur dhe me vlera, sot pas 28 vitesh nga themelimi i saj, PD-ja nuk kam më garë, por ka “enveristët” e saj të rinj që fitojnë si dikur me votim plebishitar, ku populli i “lumtur” zgjidhte udhëheqësit e vet.
Zgjedhjet në bazë e pengmarrja e tyre sot konstatohen si një problem real për PD-në, në rast se ka mbetur ende diçka nga ajo sepse tashmë Republika e Re ka hedhur katin e parë mbi ngrehinën e saj politike./ CNA.al