Jari u ngrit sot shumë vonë dhe me kokën e rëndë nga lodhja e javës, që e kishte munduar shumë për ta paraqitur shumë të afërt fitoren e Lulit. Nga mendja nuk i shqitej ai emërimi i Ridvan Bodes në bordin e Bankës së Shqipëri. Një ndjenjë mes xhelozisë dhe inatit e kishte mbërthyer fort Jarin, sepse i kujtoheshin të gjitha talljet që Edi Rama dhe figurat e tjera të PS, sidomos gjatë kohës që ishte president.
Ndërkohë ndaj Ridvanit kishte pasur gjithmonë komplekse edhe se kishte qenë gjithmonë shefi i tij në parti, por mbi të gjitha se ishte ende i tmerruar nga rastet kur ai bënte sherr me Doktorin në mbledhjet e qeverisë. Në ato momente Jari ishte gati ta bënte në brekë dhe ishte gati të vdiste vetëm që mos të vazhdonte më debati, se kishte frikë që Doktori duke shkumbëzuar, mund ta nxirrte inatin diku tjetër, ngaqë nuk kishte se çfarë t’i bënte Ridvanit.
Ja ku më erdhe në dorë sot më në fund, o Ridvan Bode, gati sa nuk thirri dhe nisi të shkruajë mesazhin e mëposhtëm:
Të nderuar miq, Jari ju sqaron!
Ridvan Bode është poli-tradhtari më i madh në historinë e Partisë Demokratike, i cili ka punuar që ditën e parë, kur shkeli në seli, e deri më dje, që u dekonspirua nga Edi Rama, për t’i ngulur asaj thikën pas shpine. Dhe papritur nisën t’i vijnë ndër mend fjalët që u thanë për Mehmet Shehun nga Enver Hoxha, kur ai ishte Skënderbegas dhe e kishte përjetuar shumë thellë atë ngjarje.
Por ju mos prisni që për Ridvanin të reagojë vetë Doktori, sepse kohët kanë ndryshuar, nuk jemi më në vitin 1981. Plus që ai ka edhe ca halle të vetat nga këto të Reformës në Drejtësi, që Ridvani ia njeh, ndaj nuk është mirë që ta sulmojë direkt. Por rrini të qetë se ja marrë të gjitha masat që ai të denigrohet nga të gjithë anët dhe ta paguajë shtrenjtë tradhtinë e vet, por të mos dalë askund me emër as Doktori dhe as Luli.
Dëshiroj t’ju informoj se tradhtia e Ridvanit ka prekur më shumë Lulin se sa Doktorin. Sepse ky i fundit edhe mund t’ia falë, se tek e fundit të dy për pension janë bërë, por mbi të gjitha se ka qenë pa shpenzime. Kurse Luli nuk do t’ia falë kurrë atë, se i hoqi nga dora një shuk të mirë lekësh, ngaqë Banka e Shqipërisë konsiderohet vend i rehatshëm dhe Kunati e ka listuar tek pozicionet me tarifë “A” të pagesave.
Di që Luli ishte shumë i xhindosur, se kishte thënë në një vend, që unë po nxjerr lekë edhe tek zgjedhjet e degëve të partisë, që s’kanë fare interes, nuk ia fal vetes që të mos fitojë nga bordi i Bankës. Ndaj edhe jam i sigurt se hakmarrja mbi Ridvanin do të jetë e pamëshirshme, sepse zemërimi i Lulit dhe i Kunatit të tij është jashtë çdo përfytyrimi.
Në këto kushte, ai devolliu i ndyrë ka dy rrugë: Ose të paguajë si gjithë të tjerët, ose të tërhiqet e t’ia lëshojë vendin një tjetri, që di si ta shprehë mirënjohjen. Në rast të kundërt, do të shihni se si do t’ia bëjmë “ftyrën si kpuca”(shprehje legjendare e Doktorit).
I juaji Jari!