Ditën e enjte banorët e Astirit organizuan një protestë të dhunshme para Kuvendit duke kërkuar me forcë mos shembjen e banesave të tyre të cilat përfshihen në projektin e “:Unazës së Madhe”. Gjatë kësaj protestë policia u sulmua me shashka dhe mjete plasëse duke shkaktuar disa efektivë të plagosur, por midis tyre më rëndë ishte policja Ina Nuku, të cilës iu këputën gishtat.
Personi që sulmoi efektiven Ina tashmë është arrestuar, por sikurse është bërë publike në pamjet filmike tri deputetë të LSI-së kanë penguar prangosjen e 18-vjeçarit, Daniel Drobaj ditën e enjte. Ai është i dyshuari kryesor që gjymtoi rëndë efektive e policisë.
Pamjet tani japin një tablo shumë të qartë të rolit të deputetëve të LSI në protestën e dhunshme para Parlamentit, të cilët me qëllim pengojnë arrestimin e 18 vjeçarit, duke i krijuar atij mundësi shpëtimi për veprën e rëndë penale që ai akuzohet nga drejtësia. Të përfshirë në këtë akt janë deputetët e LSI-si Luan Rama, i cili ka qenë dhe ministër i Brendshëm, Endrit Braimllari dhe Floida Kërpaçi.
Këta 3 deputetë arrijnë t’ia heqin policisë nga duart Drobajn, ndërsa siç shihet edhe nga pamjet nuk mungojnë as aktet e dhunës në drejtim të efektivëve të uniformave blu. Pas akteve të dhunës të frymëzuara dhe nga prezenca e deputetëve të LSI, policia vendos mos ta shoqërojë 18-vjeçarin, i cili duke pasur dhe mbështetjen e deputetëve të LSI, sërish tenton të godasë policët.
Nisur nga kjo tablo bëhet mëse e qartë që të 3 deputetët e LSI janë përfshirë në vepra penale si pengim i policisë për arrestimin e personave që kanë kryer vepra penale, dhunë ndaj uniformave blu dhe përkrahje të autorëve të dyshuar për vepra të rënda penale duke penguar me dashje ndalimin e tyre dhe përballjen me ligjin.
Nisur nga kjo situatë natyrshëm lindin pyetjet nëse duhet të hetohen këta 3 deputet dhe nëse duhet që prokuroria të kërkoj heqjen e imunitetit të tyre pa dallim, apo imuniteti do të vijojë të jetë mburoja për veprat penale që kryejnë deputetët?!