Ish-drejtuesi i PD në Kukës, Ibsen Elezi, i cili është edhe pjesë e Lëvizjes për Shpëtimin e Partisë Demokratike, deklaroi ditën e djeshme se kryedemokrati Lulzim Basha duhet të largohet, pasi sipas tij, rezultati në zgjedhjet lokale 201, do të jetë fatal për demokratët. Gjatë një prononcimi për mediat, teksa komentoi zgjedhje e nisura për degët e PD, Elezi u shpreh i bindur se procesi që po zhvillohet për kryetarët e PD në rrethe është farsë. “Parashikoj largimin e Bashës dhe hapjen e një procesi zgjedhor në PD, në të kundërt në zgjedhje do të dalim shumë keq. Beteja s’është më e Berishës por e jona.
Me fakte dhe video konkrete shihet sesi janë vjedhur votat për zgjedhjen e Bashës. Duke qenë se PD sot me një kryetar jolegjitim, Basha ka shpërndarë njerëzit e tij për të mbyllur një proces farsë. Ka shumë pak elitë, që Basha nuk ka çfarë t’ju bëjë dhe ata do vazhdojnë të jenë, por gjithsesi, ata janë shumë pak”, deklaroi ai. Më tej, Elezi theksoi se në këto zgjedhje po marrin pjesë njerëz të cilët nuk kanë dhënë kontribut në PD. “Nota rezerve ka gjithmonë. Situata e zgjedhjeve në nivelin e parë ka problematika që nuk kalojnë lehtë. Ka mbi 100 kryetarë që konfirmojnë që as nuk janë njoftuar për realizimin e mbledhjeve. Kjo është shkelje statutore. PD merr e selekton 2-3 vetë por kjo nuk është normal. Unë do vijoj të jem në PD edhe kur Basha të mos jetë më.
Ne nuk mund të ndërtojmë strukturë. Ne bashkëbisedojmë me demokratë për shumë element që në PD duhet të zgjidhen. Këto janë problematika të qenësishme. Të shtunën kemi organizuar një protestë. PD është drejt rënies. Në grupseksione janë zgjedhur njerëz që nuk kanë kontribuuar. Impenjimi është i ulët. Ka demokratë që e kanë dhënë kontributin e tyre të jetës në PD, dhe ne duam që ato të marrin pjesë. Beteja për shpëtimin e PD nuk është vetëm në PD”, u shpreh ai.
Ndërkohë, Elezi deklaroi se largimi i Bashës duhet të kthehet në një precedent, në mënyrë që sipas tij, të gjithë ata të cilët nuk zbatojnë ligjet dhe normat, të largohen nga drejtimi i një partie, por edhe vendit. “Demokratët duhet të çohen në këmbë, se s’ka më lidhje me figurat. Duhet të krijojmë një precedent, se ai që s’pyet për ligje dhe norma duhet të largohet nga drejtimi. Ka paaftësi në analizë, se ata që sillen kështu duhet të largohen. Kjo është kauzë, jo Babalja. Të duhet Babalja për ta parë që është i lidhur me krimin. Në rastin që kryeministri pretendon se është i aftë dhe bën shtet, duket që i ka terrorizuar njerëzit. Kjo s’është mënyra për të bërë shtet”, nënvizoi Elezi.