Ministrja e Drejtësisë, Etilda Gjonaj priti ditën e djeshme në një takim të dërguarit e Komisionit të Venecias, Veronika Bilkova, ish-zëvendëspresidente e Komisionit të Venecias; Jørgen Steen Sørensen, anëtar i Komisionit të Venecias; James Hamilton ish anëtar zëvendësues i Komisionit të Venecias; Artemiza-Tatiana Chiska, Sekretariati i Komisionit të Venecias.
Ministrja vlerësoi rolin e Komisionit të Venecias si një partner shumë i rëndësishëm që ka kontribuar dhe bashkëpunuar efektivisht në shumë procese të rëndësishme për Shqipërinë dhe sidomos për reformën në drejtësi. Gjatë takimit ministrja Gjonaj iu përgjigj interesimit të tyre lidhur me projekt propozimin e Partisë Demokratike për vettingun e politikanëve, duke vënë theksin tek ngritja e institucioneve të reja të drejtësisë, të cilat do të bëjnë pastrimin e politikës nga zyrtarë të inkriminuar apo të korruptuar.
Ministrja e Drejtësisë u shpreh se tashmë është vendosur një standard i ri me ndryshimet kushtetuese të vitit 2016 për reformën në drejtësi, duke ju nënshtruar më parë një procesi konsultimi me konstitucionalistë, ekspertë dhe shoqërinë civile, standard i cili duhet të ruhet në çdo rast të ndryshimeve kushtetuese.
Sistemi i ri i drejtësisë, ngritja e institucioneve të SPAK garantojnë ndëshkueshmërinë e zyrtarëve të lartë, pasi është një sistem i depolitizuar dhe i pavarur. Po ashtu, ministrja Gjonaj i informoi anëtarët e Venecias lidhur me ndryshimet e kuadrit ligjor për përjashtimin e të gjithë kompanive duke përfshirë dhe administratorët dhe ortakët, të cilët kanë precedentë penalë, për të përfituar nga fondet publike.
Dy ditë më parë ekspertët ndërkombëtarë janë takuar me nënkryetaren e Kuvendit, Vasilika Hysi, e më pas në takime të ndara me përfaqësues të grupit parlamentar të socialistëve, demokratëve dhe LSI-së. Gazeta mësoi se ekspertët janë shprehur qartë duke deklaruar se në Shqipëri janë mundësitë për veting në politikë përmes reformës në drejtësi dhe për këtë arsye kanë kërkuar që të ngrihet menjëherë SPAK dhe BKH, duke rrëzuar në një farë mënyre edhe nismën e opozitës. Ekspertët e kanë shprehur qartë se vetingu në politikë bëhet nga organet e reja të drejtësisë.