Tashmë kur po bëhen gati dy vite që prej miratimit të reformës në drejtësi, është momenti që të shohim goditje në nivele të larta. Koha është tani. Arta Marku, Donika Prela të ndihmuar edhe nga shtetet partnere SHBA-BE-Britania e Madhe kanë patur të gjithë kohën e nevojshme për hetime.
Çështja e dosjeve të bujshme në Shqipëri nuk çalon tek kopsitja e tyre me elementë të dënueshëm, por te mungesa e vullnetit për të vënë para përgjegjësisë të implikuarit. Në Shqipëri nuk janë bandat krimi i organizuar dhe vetë politikanët e kanë pohuar se ata janë thjesht grupe “rrugeçërish”. Krimi i organizuar në Shqipëri është politika.
Koha është tani. Vendi duhet të shkojë drejt shembujve që kanë dhënë Kroacia, Rumania dhe Maqedonia.
Ka shumë politikanë në vend që kanë kryer afera të shumta korrupsioni. Shumë kanë arritur të mbyllin çështjet në prokurori, ndërsa të tjerët kanë vulosur pafajësinë dhe në gjykatë.
Por është koha tani të marrë fund epoka e pandëshkueshmërisë.