Nuk e kuptonte në duhet të ishte i gëzuar apo i mërzitur, dhe nuk kishte kë të pyeste, sepse gruaja kishte shkuar tek parukierja.
Kapitullimi i “komandantit të Përgjithshëm” e kishte lumturuar shumë, ngaqë tani nuk do të kishte më kush gojë të fliste se ai nuk ishte treguar burrë me Fatmir Xhafajn para dy vjetësh.
“Ku jeni futur tani ju që u mburrët deri dje me trimërinë e Likes”, gati sa nuk thirri, por kafshoi gjuhën, se u kujtua se Doktori ishte bërë ‘dhe’ pas asaj që ndodhi.
Dhe befas u kujtua se edhe ai nuk kishte duruar deri në fund, por ashtu si Doktori, e kishte mbështetur publikisht mosdekretimin e Sandër Lleshit, ndonëse të dy ishin të bindur se ajo nuk kishte bythë ku të rrinte.
Vetëm Luli ishte treguar skuth, dhe nuk ishte nxituar, por kishte thënë vetëm fjalë të përgjithshme, nga ato të kasetave të zakonshme.
Kjo duhet ta ketë xhindosur më shumë Doktorin, mendoi, se vetëm ne të dy kemi dalë si kullufa nga kjo histori.
Por dikur e mblodhi veten, sepse duhet të shkruante mesazhin e përditshëm për demokratët, ndaj nuk humbi shumë kohë, por shkroi si më poshtë:
“Të nderuar miq, Jari ju sqaron!
E di që jeni shqetësuar nga zbythja e papritur e “komandantit të Përgjithshëm”, por nuk duhet të dekurajoheni, sepse historia ka treguar se vetëm i zoti e nxjerr gomarin nga balta.
Ndaj, prej sot, do të mbështetemi veç në forcat tona, duke i përqëndruar të gjitha bateritë tek beteja e Astirit.
Është e vetmja mënyrë për ta rrëzuar sa më shpejt këtë qeveri të korruptuar.
Për arritjen e qëllimit final është menduar që të përshkallëzohet protesta dhe të përforcohet grupi i deputetëve të gatshëm me pjesën më intelektuale dhe më inteligjente të opozitës.
Krahas çunit të Fahri Balliut dhe Flamur Nokës, në ballë të protestës janë caktuar të shkojnë edhe Muslim Murrizi, Tritan Shehu, Agron Shehaj dhe Albana Vokshi.
Kjo e fundit është edhe grua që duket si burrē, edhe bjonde, edhe kandidate për nënkryetare partie, nëse Luli do bëjë me gjithë mend zgjedhje.
Por ajo që do t’i japë goditjen finale qeverisë së drogës dhe krimit, është përfshirja e Avokates së Popullit në këtë betejë.
Ajo ka marrë përsipër të shqyrtojë të gjitha dokumentet e projektit dhe të nxjerrë çmimin që duhet të paguajë shteti, për çdo metër katror që do prishet.
Siç dihet, ajo ka qenë avokate e Lulit për pallatin që i prishi Rama në Vlorë, për të cilin u kapën 16 milion euro.
Sipas një llogarie të përafërt, Luli fitoi rreth 1800 euro për metër katror nga gjyqi.
Meqë avokatja është shoqe e ngushtë e gruas së Lulit, ajo nuk mund të ketë kurrë dy standarte.
Dhe me çmimin e pallatit të Vlorës, që do të aplikohet për 300 e ca shtëpitë e Astirit, pritet që qeverisë t’i shkojë një faturë prej 3 miliard e gjysëm euro.
Ajo sigurisht që nuk i paguan dot kaq shumë lekë, dhe do të shpallë falimentimin.
Ndaj fitoren e kemi të sigurtë.
I juaji, Jari!”