Kryeministri Edi Rama ka thënë në emisionin “Repolitix” në Report TV, se Ilir Meta nuk ka asnjë argument dhe deri të premten duhet të dekretojë si ministër të Brendshëm, Sandër Lleshin.
“Presidentit i është dhënë mundësia të kërkojë tërheqjen e Sandër Lleshitt nga çdo lloj statusi publik.
Ose nëse nuk pajtohet me të, do të ushtrojë si president çdo kompetencë për ta çdekretuar Sandër Lleshin dhe për t’a dekretuar sërish.
Një ushtarak aktiv, s’mund të ushtrojë detyën e ministrit, por fare mirë tërhiqet nga statusi i tij, në momentin kur vendoset si ministër.
I kemi dhënë mundësinë të zgjedhë çfarë të dojë.
Në të dyja rastet, këto të dyja çojnë tek dekretimi i ministrit të Brendshëm.
Kam besim se presidenti do të arrijë në përfundimin e duhur.
Ajo që ndodhi me vendimin e tij për të mos marrë vendim, do të kalojë dhe presidenti do e dekretojë ministrin e Brendshëm”, tha Rama.
Ai u shpreh se shpreson që Meta të mos jetë nën ndikimin e opozitës.
“Uroj që realisht Meta të ketë shqetësimin që ka shprehur dhe të mos jetë viktimë e trazirës morale e psikologjike të opozitës, që mund të ketë influencë mbi të, për të patur një rol destruktiv.
E kam thënë dhe në parlament, për sa kohë që s’kam argument për këtë çështje, e zgjidhim”, tha Rama.