Në Kaliforninë Jugore vijon lufta me zjarret e fuqishme, përfshi njërin në veri të Los Angelesit dhe një tjetër në kantonin Ventura, pranë Thousand Oaks, aty ku një veteran i Marinës qëlloi për vdekje 12 persona në një klub të muzikës “country”, gjatë së mërkurës.
Dy trupa të pajetë u gjetën në Malibu, – një prej zonave më të lakmuara në Kaliforni nga yjet e “Hollywood”-it, që kërkojnë si privatësi, ashtu dhe luks, – në një zonë ku zjarri i mbiquajtur “Woolsey” pushtoi thuajse gjithçka, njoftoi Departamenti i Sherifëve të Los Angelesit.
Zjarri “Woolsey” ka shkrumbuar rreth 33.500 hektarë, ka shkatërruar të paktën 177 struktura dhe u frenua në vetëm 5 për qind të valës së tij të egër. Urdhra evakuimi u lëshuan për mbi 88 mijë shtëpi në kantonin Ventura, sikurse edhe në Los Angelesin fqinj.
Madje, një yll televiziv si Kim Kardashian West, e cila jeton në veri të Malibusë bregdetare, ishte një prej personave të famshëm që është detyruar të braktisë shtëpinë për të shpëtuar jetën.
Regjisori Guillermo del Toro njoftoi përmes “Twitter”-it se “Bleak House”, muzeumi i tij i relikeve të filmave horror, ishte i sigurtë pavarësisht frikës së tij të mëparshme se do të mund të shkrumbohej.
Aktori Martin Sheen, i cili u raportua për pak çaste si i zhdukur nga i biri Charlie, ishte detyruar në fakt të evakuohej.
“Jemi mirë, ndodhemi në plazhin Zuma dhe me shumë mundësi do të flemë në makinë sonte”, tha Martin Sheen për “Fox News 11”, teksa shtoi se ky ishte zjarri më i keq që kishte parë në 48 vite jetesë në Malibu.
Zjarret e furishme arritën deri në fermën “Paramount”, duke shkatërruar qytezën perëndimore, ku ndodhen setet e përdorura për qindra produksione kinematografike, përfshi edhe prodhimin e HBO-së “Westworld”.