Pasditen e sotme zv/ministri i Brendshëm Sandër Lleshaj njoftoi se 52 shtetas grekë të cilët erdhën dje në varrimin e Kostandinos Kaçifas në Bularat, janë shpallur non grata në Shqipëri.
Kjo për shkak se këta shtetas përbëjnë rrezik për rendin dhe sigurinë në vend, pasi ditën e djeshme shkaktuan incidente në Gjirokastër, një ndër të cilët ishte edhe bllokimi i rrugës drejt Kakavijës për të gjitha makinat.
Prokuroria ka sqaruar se 44 prej tyre nuk do të mund të hyjnë në Shqipëri për 10 vite.Ndërkohë për të tjerët, janë referuar veprimet dhe është kërkuar shpalljen si të padëshiruar në vendin tonë për 15 vite në një fazë të dytë.
‘Të padëshiruarit’ akuzohen për prodhim dhe mbajtjet të armëve të gjuetisë, prodhim dhe mbajtje të armëve të gjuetisë, kalim të paligjshëm të kufirit si edhe nxitje të urrejtjes dhe shpërndarje të shkrimeve antikushtetuese.
Njoftimi i Policisë:
Në vijim të informacionit lidhur me shoqërimin e disa shtetasve që gjatë ceremonisë mortore të të ndjerit Konstandinos Kacifas në Bularat, ku bënë thirrje raciste dhe bllokuan rrugën nacionale, në përfundim të veprimeve të kryera nga Drejtoria e Antiterrorit në bashkëpunim me Drejtorinë Vendore të Policisë Gjirokastër, Drejtoria Rajonale e Kufirit dhe Prokuroria e Rrethit Gjyqësor Gjirokastër, u referuan materialet në Prokurorinë pranë Gjykatës së Shkallës së Parë Gjirokastër dhe ndiqen në gjendje të lirë shtetasit:
– Th.P., banues në Patra;
– Th.A., banues në Athinë;
– K.G., banues në Athinë;
– A.P., banues në Igumenicë;
– Th.P., banues në Piurgu Ilias, Peloponez;
– D.K., banues në Igumenicë;
– P.P., banues në Igumenicë;
– M.D., banues në Igumenicë;
– Ch.K., banues në Athinë;
– Th.S., banues në Livadhja, Sarandë;
– A.P., banues në Prevezë.
Sipas njoftimit të policisë, këta shtetas gjatë ceremonisë mortore të shtetasit Kacifas, në fshatin Bularat, Bashkia Dropull, në bashkëpunim dhe me persona të tjerë kanë bërë thirrje për urrejtje dhe përdorim të dhunës ndaj popullsisë shqiptare, e kënduar në kor nga pjesëmarrësit në gjuhën greke, si dhe thirrje të tjera raciste duke nxitur urrejtje dhe grindje midis popullsisë.
Në cilësinë e provës materiale këtyre shtetasve u janë gjetur dhe sekuestruar: maskë ngjyrë e zezë; flakadanë; flamuj me mbishkrimin “Vorio Epiri”; A.H 1914; bluza me mbishkrimin Vorio Epiri AH1914, “Ethniko Metepo”, “Misos” dhe 2 aparate celularë. Po punohet për identifikimin e personave të tjerë të implikuar.
Materialet në ngarkim të tyre i kaluan Prokurorisë për veprat penale “Nxitja e urrejtjes dhe grindjeve”, “Shpërndarja apo futja e materialeve, shkrimeve apo simboleve nga jashtë në Republikën e Shqipërisë, të cilat synojnë përmbysjen e rendit kushtetues a cënimin e tërësisë tokësore të vendit”, “Kalimi i paligjshëm i kufirit shtetëror”, kryer në bashkëpunim parashikuar nga nenet 265, 225/2, 297 dhe 25 të Kodit Penal.