Nga Anri Bala
A e dini se çfarë është analfabeti funksional? Nëse jo, po ua them, e nëse doni shembuj ilustrimi e keni në krye të shtetit, çuditërisht të një vendi ku analfabetizmi është rritur në kohën e internetit, kur politika u mbush me ato monstra… analfabetët funksional.
Për ju që nuk e dini apo nuk doni ta dini, se ju kanë çarë trapin aq shumë në media, podiume, salla e sallone, si ronxhobonxho e dordoleca të veshur e pispillosur keq, duke na u neveritur… analfabeti funksional, përkufizon ata persona, të cilët janë në gjendje të lexojnë dhe shkruajnë fjali të thjeshta, të pakomplikuara, por nuk mund të shkruajnë a lexojnë aq mirë, sa të ballafaqohen me kërkesat e përditshme të shoqërisë dhe tregut të punës.
Ata nuk janë në gjendje a në vullnet për të lexuar tekste të vështira e aq më pak nuk janë të aftë, për t’i aplikuar këto njohuri. Kjo është arsyeja që presidenti ynë nuk është fajtor, sepse të lexosh dhe të interpretosh Kushtetutën, është tepër e vështirë, bile aq e vështirë, sa as ca profesora që janë konstitucionalist, nuk e dinë mirë për çfarë flitet, se edhe ato për dreq, nuk dihet se ku e kanë mbaruar shkollën, në çfarë koteci, sepse i thonë këmbës dorë dhe dorës këmbë.
Një gjë më habit! Po si e çau tregun e punës shtangisti, që kishte ngritur shtanga të lehta me përmasat e trupit, ndërsa tani që ka hipur lart ngre peshat e rënda të pushtetit… që ëndërron?!
Nuk ka faj, se kur arriti deri aty, pse mos të kacavjerret edhe pak më sipër… në murin e avllisë së komshiut, me ligj sipas leximit të atij, që nuk di të lexoi?!
Në asnjë rrjesht të Kushtetutës, deri në faqen e fundit, duke e lënë pas ndarjen e pushteteve, nuk thotë, se Kryetari i Shtetit, duhet të mendohet për të dekretuar qeverinë. Askush nuk e di, se kush e ngatërron këtë “mendimtar” me ligje dhe kushtetuta, që janë të thjeshta aq sa edhe populli, t’i kuptoj ashtu siç shkruhen:
Neni 98
1. Ministri emërohet dhe shkarkohet nga Presidenti i Republikës, me propozim të Kryeministrit, brenda 7 ditëve.
2. Dekreti shqyrtohet brenda 10 ditëve nga Kuvendi.
Neni 103
1. Ministër mund të caktohet kushdo që ka cilësitë për deputet.
2. Ministri nuk mund të ushtrojë asnjë veprimtari tjetër shtetërore dhe as të jetë drejtues ose anëtar i organeve të shoqërive fitimprurëse.
3. Anëtarët e Këshillit të Ministrave gëzojnë imunitetin e deputetit.
Sa pak rrjeshta janë, por kush t’i lexoj Manjani, që për fatkeqësinë e këtij vendi, u ul si qylaxhi në sofrën e drejtësisë në kohën kur duhej të ishte ulur në bangën e të akuzuarve, për ca aferat të errta që nga Saranda e deri tek të burgosurit me byzylykë, apo Çimi jo Peka, sepse ai është si puna ime, e mund t’i interpretoj si të dojë, por ky tjetri Çim Rustemi ( Gjata), që kurrë nuk e përmend babain e tij me një “nam të mirë” në Shkodër, si gjyqtari më i egër i diktaturës.
Manjani dhe Çimi, seriozisht e kanë që nuk dinë të lexojnë dhe fantazojnë ligje imagjinare, që irritojnë dhe derrin e jo më qytetarin… presidenti duhet të bindet.
Nuk e di e ndoshta as ne nuk dimë të lexojmë me menyrën e tyre e pastaj ta interpretojmë, por le të na gjejnë vetë një nen të Kushtetutës, ku thuhet se presidenti duhet të bindet… për të dekretuar qeverinë dhe unë do i’ua puth dorën që ma treguan, sepse u rropata dhe nuk po e gjej asgjëkundi. Madje do i tërheq pas të gjitha lëvdatat, që po u bëj dhe do i kërkoj hesap mësuesve, që nuk më paskan mësuar të lexoj… imagjinatën, por vetëm çfarë shkruan lapsi i zi mbi fletën e bardhë.
Do kërkoj, që emërtimi analfabet funksional të hiqet dhe të thuhet “shkrues në akull dhe lexues në erë”, që ne na “mungonin”, apo aty ishin, por ne nuk na u dha mundësia t’i shikonim e dëgjonim, kur shpallin analfabetizmin e tyre… si dituri.
Qesh, qesh mor qerrata popull, se edhe këta kishe mangut në krye të shtetit, njerëz që lexojnë por s’kuptojnë çfarë lexuan, njerëz që shkruajnë, por nuk e dinë se çfarë shkruajtën, që këshillohen nga e njëjta racë… të diplomuarit e pashkolluar.
Por një këshillë mund tu jap, gjithë ju miqve dhe jo miqve të mi, se armiq nuk kam: O popull, mos ma bëni fajtor kryeshtetarin, sepse nuk ka asnjë faj, e po u lutem si “Jezu Krishti” para ekzekutimit, falini analfabetët, ato nuk e dinë se çfarë po bëjnë, por jo ata… që e bëjnë me qëllim! /Ekskluzive.al